БО АЗОБ МУРД... 24 СОЛ ҲУКМИ ЗИНДОНИ ВАЗИРИ СОБИҚИ ҚАЗОҚ БАРОИ ҚАТЛИ БЕРАҲМОНАИ ҲАМСАРАШ 

Додгоҳи махсуси байниноҳиявӣ дар шаҳри Остона, пойтахти Қазоқистон рӯзи 13 майи соли 2024 вазири собиқи иқтисоди ин кишвар Қувандиқ Бишимбоевро бо ҷурми азобу уқубат ва қатли бераҳмонаи ҳамсараш Салтанат Нукенова ба 24 соли зиндон маҳкум кард. Додгоҳ хешованди Бишимбоев Бахитҷон Бойҷоновро низ 4 соли зиндон дод. Бар асоси ҳукми додгоҳ, Бойҷонов ба ҳайси мудири тарабхонае, ки Салтанатро дар он ҷо куштанд, ба кормандонаш амр додааст, ки ба Бишимбоев барои пӯшондани изи ин ҷинояти мудҳиш кумак расонанд.

Шоми 9 ноябри соли 2023 табибоне, ки ба тарабхонаи BAU дар шаҳри Остона даъват шуда буданд, марги Салтанат Нукеноваи 31-соларо санад карданд. Дар сару рӯ ва бадани ӯ осори зиёди зарбу лат дида мешуд. Худи ҳамон рӯз пулис бо иттиҳоми қатли ин ҷавонзан шавҳари 44-солаи ӯ Қувандиқ Бишимбоевро боздошт кард.

Тарабхонае, ки мурдаи Салтанатро дар онҷо ёфтанд, ба хонаи Бишимбоевҳо тааллуқ дошта, раиси ширкате, ки ин тарабхонаро мечархонад, Бахитҷон Бойҷонов, хешованди Бишимбоев буд.

Айбдоркунанда дар додгоҳ гуфт, Бишимбоев Нукеноваро пайваста мезад ва руҳан азоб медод. Бар асоси хулосаи тафтишот, шаби 9 ноябр вазири собиқ дар тӯли чандин соат ҳамсарашро дар тарабхонаи BAU латтукӯб кардааст ва сабаби марги ҷавонзан ҷароҳатҳое шудааст, ки ӯ бар асари латтукӯбҳои оншаба ва қаблӣ аз ҷониби шавҳараш бардошта буд.

Ташхис хулоса додааст, ки Нукенова танҳо аз қисмати сараш беш аз 10 зарба хӯрдааст ва дар баданаш осори буғӣ кардан ҳам дида мешавад. Ташхис ба хулосае омад, ки Салтанат Нукенова бо азоб ва зери уқубати зиёд ҷон додааст.