Президенти Тоҷикистон дар маросими азои фавтидагони фоҷеа дар Эрон иштирок кард
Президенти Тоҷикистон Эмомалӣ Раҳмон рӯзи 22-уми май барои иштирок дар маросими видоъ ва изҳори таъзия бинобар даргузашти фоҷеавии Иброҳим Раисӣ, раиси ҷумҳури Эрон ба шаҳри Теҳрон сафар кард.
Ӯ аз нақши арзишманди Сайидиброҳим Раисӣ дар густариши дӯстӣ ва рушди ҳамкории дуҷониба ёдовар шуд.
Тавре ки хадамоти матбуоти сарвари давлат хабар медиҳад, Эмомалӣ Раҳмон дар шаҳри Теҳрон дар маросими азои фавтидагони фоҷеа - Раиси Ҷумҳурии Исломии Эрон Сайидиброҳим Раисӣ ва ҳамроҳонаш иштирок кард.Сарвари давлати Тоҷикистон ба муовини аввали Раиси Ҷумҳурии Исломии Эрон Муҳаммад Мухбир, мардуми дӯсту бародари Эрон ва наздикону пайвандони шаҳидшудагон ҳамдардии амиқ изҳор дошт.
Зимни суҳбати Эмомалӣ Раҳмон бо муовини аввали раиси Ҷумҳурии Исломии Эрон Муҳаммад Мухбир ҳамчунин алоқамандии ҳарду ҷониб ба идомаи босубот ва густариши минбаъдаи муносибатҳои дӯстӣ ва ҳамкории гуногунҷанбаи Тоҷикистону Эрон таъкид гардид.