Дар солгарди оташбаси Қарабоғ Путин бо Пашинян ва Алиев мулоқот мекунад
Алиев ба мулоқоти сеҷониба бо ҳамтои русиягияш, Владимир Путин ва нахуствазири Арманистон, Никол Пашинян ба Сочи рафт, хабар дод дафтари матбуоти раисҷумҳури Озарбойҷон.
Қаблан котиботи ҳукумати Арманистон низ аз сафари нахуствазир, Пашинян ба Сочи хабар дод.
Ин сафараҳо бо даъвати раисҷумҳури Русия сурат гирифта, мулоқот дар арафаи солгарди имзои созишномаи оташбас дар Қарабоғи куҳӣ сурат мегирад.
Ба навиштаи РИА Новости, таваҷҷуҳи асосӣ дар ин ҳамоиш ба барқарорсозию тавсеаи ҳамлу нақл ва муносиботи тиҷорию иқтисодӣ дода мешавад. Инчунин баррасии шиддати ахири вазъ дар марзи Арманистону Озарбойҷон низ аз эҳтимол дур нест. Инчунин дар ин мулоқот метавонад қарор дар бораи ташкили комиссияи муайянсозию аломатгузории марз қабул шавад.
Инчунин дар Сочи суҳбатҳои алоҳидаи Путин бо Пашинян ва Алиев дар назаранд.
Маврид ба зикр аст, ки моҳи сентябри соли 2020 дар Қарабоғи куҳӣ даргирӣ шиддат гирифт, ки давоми танишҳои бисёрсолаи Арманистону Озарбойҷон буда, бо қурбониёни зиёд миёни сокинони мулкию низомиён анҷомид. Ниҳоят бо миёнаравии Маскав оташбас эълон гардиду шаби 10 ноябр созишномаи сеҷониба имзо шуд.
Сарчашма: Sputnik Tajikistan