Дар Тоҷикистон интихоботи миёндаврии парлумон доир мешавад
Дар ноҳияҳои Деваштичу Балх ва Вахш вакилони нав интихоб мекунанд
Сурат: parlament.tjКомиссияи марказии интихобот ва раъйпурсӣ (КМИР)-и Тоҷикистон дар бораи рӯзи 18 апрел баргузор намудани интихоби вакилон ба Маҷлиси намояндагони Маҷлиси Олии Тоҷикистон ба ҷойи вакилоне, ки қабл аз анҷоми давраи ваколаташон аз ҳайати парлумон хориҷ шудаанд, дар ҳавзаҳои интихоботии Деваштич, Балхӣ ва Вахш қарор қабул кард, хабар дод ба “Азия-Плюс” як манбаъ дар КМИР Тоҷикистон.
Ёдрас мекунем, ки аввали моҳи декабри соли гузашта раиси Комиссияи экологии палатаи поёнии парлумон, вакил аз ҳавзаи интихоботии Деваштич Зуфар Исмоилзода бинбар сабаби таъин шудан ба вазифаи раиси КИМ ҲХДТ дар вилояти Суғд ваколатҳояшро дар парлумон супурд.
Қаблан вакили Маҷлиси намояндагон аз ҳавзаи интихоботии Балхӣ Ҳоким Холиқзода низ дар робита ба рӯзи 20 июни соли 2020 муовини раиси Бонки миллӣ таъин шуданаш, аз ҳайати парлумон хориҷ шуд.
Нимаи моҳи ноябри ҳамин сол президент ӯро раиси Бонки миллии Тоҷикистон таъин кард.
Намояндаи дигари ҲХДТ Бахтовар Сафарзода аввали моҳи октябри соли гузашта намояндаи доимии Тоҷикистон дар Ассамблеияи байнипарлумонии ИДМ таъин шуда, дигар дар ҳайати парлумон кор намекунад.
Бахтовар Сафарзода дар Маҷлиси намояндагон аз ҳавзаи интихоботии Вахш намояндагӣ мекард.
