Тоҷике, ки Бритониё ҳамроҳи Лукашенко таҳрим кард, кист?
Ӯро Иттиҳоди Аврупо низ соли 2012 таҳрим карда будааст
Сурат: belnovosti.byБритониёи Кабир ва Канада бархе чеҳраҳоеро, ки дар Белорус ба нақзи ҳуқуқи башар муттаҳам дониста мешаванд таҳрим карданд, ки дар садри ҷадвал раисҷумҳури ин кишвар Александр Лукашенко қарор дорад. Рӯйхати Канада 11 нафарро дар бар мегирад ва рӯйхати Бритониё 8 нафарро, аммо дар миёни касоне, ки ба рӯйхати Бритониё афтодаанд, номи як тоҷик низ ҳаст.
Атобеков Ҳазалбек Бахтибекович тоҷике ҳаст, ки дар баробари Лукашенко дар рӯйхати шахсони мавриди таҳрими Бритониё афтодааст. Бино ба маълумоте, ки саҳфаи Атобеков дар Википедиё дорад, ӯ сарҳанг (полковник) ва аз соли 2018 муовини фармондеҳи неруҳои дохилии Белорус аст. Тибқи маълумоти донишномаи озод, Атобековро соли 2012 Иттиҳодияи Аврупо низ таҳрим кардааст.
Дар шарҳи ҳоли Бахтибеков омадааст, ки ӯ тоҷик аст ва соли 1990 Омӯзишгоҳи олии ҳарбиву сиёсии Минскро хатм кардааст. То соли 2009 дар симатҳои гуногуни неруҳои дохилии Белорус хидмат кардааст. Аз соли 2009 то 2012 фармондеҳи яке аз зербахшҳои муҳим – Бригадаи 3-юми таъиноти вижаи неруҳои дохилии ВКД ва баъдан муовини сардори раёсати омодагии низомӣ ва фаврии Сарраёсати фармондеҳии неруҳои дохилии ВКД Белорус кор кардааст.
Соли 2012 Иттиҳоди Аврупо Атобековро вориди рӯйхате, кард, ки декабри соли 2010 барои пароканда кардани эътирозгарон дар Минск “бо истифода аз неруҳои аз ҳад зиёд” фармон додааст ва наметавонад ба қаламрави ин иттиҳодия сафар кунад. .
Аз 22 майи 2018 Атобеков Ҳазалбек муовини фармондеҳи неруҳои дохилии Вазорати корҳои дохилии Белорус аст.
13 августи имсол аз сӯйи Александр Лукашенко дар пасманзари муқовиматҳои шаҳрвандӣ ба медали дараҷаи 5 “Барои хидмати бенуқсон” тақдир шуд.
Дар бархе расонаҳои белорусӣ навиштаанд, ки Атобеков ҳамсари белорусӣ ва се фарзанд дорад.
