Раиси Суғд ба аёдати осебдидагони таркиши гази Панҷакент рафтааст
Раиси вилояти Суғд Раҷаббой Аҳмадзода баъди ҷаҳор рӯзи таркиши баллони газ дар чойхонаи “Самарқанд” воқеъ дар маркази шаҳри Панҷакент, ки бар асари он 23 нафар ҷароҳатҳои гуногун бардошта буданд, ба ҳолпурсияшон рафт. Раиси вилояти Суғд гуфтааст барои пурра табобат ёфтани шахсони ҷароҳатёфта мутахассисони беҳтарин сафарбар шудаанд ва барои шифоёбии онҳо кӯмак мерасонанд.Раҷаббой Аҳмадзода, раиси вилояти Суғд рӯзи 28-уми январ бо ҷароҳатбардоштагон ва пайвандони онҳо дар беморхонаи марказии Панҷакент сӯҳбат оростааст. Бино ба иттилои Хадамоти матбуоти раиси вилояти Суғд ҳоло вазъи беморон қаноатбахш буда, духтурон барои барқарорсозии саломатии онҳо аз тамоми имкониятҳо истифода намуда истодаанд.
“Худи ҳамон рӯз бо дастури Президенти мамлакат Эмомалӣ Раҳмон ва тадбирандешиҳои роҳбарияти вилоят 8 нафар мутахассисони варзидаи соҳаи тиб аз шаҳрҳои Душанбеву Хуҷанд барои табобати ҷароҳатёфтагон ба Панҷакент сафарбар карда шуданд”, - иттилоъ медиҳад Хадамоти раиси вилоят.
Раҷаббой Аҳмадзода баъди аз ҳоли беморон дидан кардан бо пайвандону наздикони онҳо сӯҳбат ороста, гуфтааст, ки барои пурра табобат ёфтани ҷароҳатбардоштагон мутахассисони беҳтарин сафарбар шуда, барои табобати беморон кӯмак мерасонанд.
Ёдрас мекунем, ки рӯзи 25-уми январ дар чойхонаи “Самарқанд” воқеъ дар маркази шаҳри Панҷакент бар асари таркиши баллони газ 23 нафар кормандони муассиса - 15 зану 8 мард ҷароҳатҳои гуногун бардошта, ҳамаи онҳо дар беморхона бистарӣ шуданд. Як ҷавони 21-сола баъди муоинаи тиббӣ ҷавоб дода шуда, боқимонда ҷароҳатбардоштагон ҳанӯз зери назорати духтурон қарор доранд ва мақомот мегӯяд, вазъи саломатии онҳо қаноатбахш аст.
Мақомоти Суғд сабаби таркиши балони газ дар чойхонаи «Самарқанд», воқеъ дар шаҳри Панҷакент, хиёбони Рӯдакӣ-157-ро бинобар риоя нагардидани қоидаҳои бехатарӣ арзёбӣ кардааст.
Read more: https://asiaplustj.info/tj/news/tajikistan/society/20210129/raisi-sud-ba-ayodati-osebdidagoni-tarkishi-gazi-panakent-raftaast