Байни Тоҷикистону Италия 7 санади ҳамкорӣ ба имзо расид
Дар доираи сафари президенти Тоҷикистон Эмомалӣ Раҳмон ба Италия пас аз анҷоми мулоқоту музокироти расмӣ байни Тоҷикистон ва Италия санадҳои нави ҳамкорӣ ба имзо расиданд.Тавре ки хадамоти матбуоти сарвари давлат хабар медиҳад, дар маҷмуъ аз руйи натиҷаҳои вохӯрии сатҳи олӣ 7 санади нав ба имзо расид:
- Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Италия оид ба ҳамкорӣ дар масъалаҳои амниятӣ;
- Ёддошти тафоҳум байни Агентии назорати маводи нашъовари назди Президенти Ҷумҳурии Тоҷикистон ва Вазорати корҳои дохилии Ҷумҳурии Италия оид ба ҳамкории оперативӣ дар мубориза бар зидди маводи нашъовар;
- Ёддошти тафоҳум байни Кумитаи рушди сайёҳии назди Ҳукумати Ҷумҳурии Тоҷикистон ва Вазорати сайёҳии Ҷумҳурии Италия оид ба ҳамкорӣ дар соҳаи сайёҳӣ;
- Барномаи ҳамкории фарҳангӣ, илмӣ ва технологӣ байни Ҳукумати Ҷумҳурии Тоҷикистон ва Ҳукумати Ҷумҳурии Италия барои солҳои 2024-2027;
- Ёддошти тафоҳум оид ба ҳамкорӣ дар соҳаи рушди устувор байни Кумитаи ҳифзи муҳити зисти назди Ҳукумати Ҷумҳурии Тоҷикистон ва Вазорати муҳити зист ва амнияти энергетикии Ҷумҳурии Италия;
- Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Италия оид ба бекор намудани талаботи раводид барои дорандагони шиносномаҳои дипломатӣ;
- Барномаи ҳамкорӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷӣ ва ҳамкории байналмилалии Ҷумҳурии Италия барои солҳои 2024-2026.
Пеш аз ин зимни мулоқоти Эмомалӣ Раҳмон бо сарвазири Италия Ҷорҷа Мелонӣ масоили густариши робитаҳо дар соҳаҳои сиёсӣ, иқтисодӣ, тиҷоратӣ, фарҳангию гуманитарӣ ва амниятӣ баррасӣ шуд.
Эмомалӣ Раҳмон ва Ҷорҷа МелонӣСурат аз хадамоти матбуоти сарвари давлатҶалби сармояи итолиёвӣ барои рушди соҳаи саноати Тоҷикистон барои ҳар ду кишвар судовар номида шуд.
Таъсиси хатсайрҳои мустақими ҳавоӣ ва робитаҳои ду ҷониб дар соҳаҳои маорифу тандурустӣ, ҷудо кардани квотаҳо барои шаҳрвандони Тоҷикистон дар муассисаҳои олии Италия аз мавзуъҳои дигари мулоқот буд.
Эмомалӣ Раҳмон аз Ҷорҷа Мелонӣ даъват кард, ки дар вақти барояш мусоид бо сафари расмӣ ба Тоҷикистон ташриф орад.
Рӯзи 23 апрел Эмомалӣ Раҳмон ҳамчунин бо президенти Италия Серҷо Маттарелла дидору гуфтушунид кард.
“Мо Италияро шарики муҳим ва боэътимоди худ дар Аврупо медонем”, - таъкид дошт Эмомалӣ Раҳмон дар оғози суҳбат.
Ҷонибҳо зимни музокирот маҷмӯи масоили ҳамкории байни ду давлат ва густариши робитаҳо дар соҳаҳои сиёсӣ, иқтисодию тиҷоратӣ, инчунин имконоти татбиқи лоиҳаҳои муштараки сармоягузориро баррасӣ карданд.
Эмомалӣ Раҳмон ва Серҷо МаттареллаСурат аз хадамоти матбуоти сарвари давлатДар рафти мулоқот масоили дарёфти роҳҳои нави ҳамкорӣ дар самти рафтуомади шаҳрвандон ва таъсиси хатсайри мустақими ҳавоӣ байни ду давлат баррасӣ гардид.
Зимни баррасии масоили амниятӣ ҷонибҳо оид ба роҳҳои муборизаи босамар бар зидди терроризм, ифротгароӣ ва ҷиноятҳои муташаккили фаромиллӣ, аз ҷумла қочоқи маводи мухаддир ва ҷиноятҳои киберӣ изҳори назар карданд.
Дар фароварди мулоқот Эмомалӣ Раҳмон аз президенти Италия даъват ба амал овард, ки бо сафари расмӣ ба Тоҷикистон ташриф орад.
