“Савдогар”-и раводид ба Аврупо дар пойтахт дастгир шуд
Ӯ бо роҳи фиреб 7 ҳазор доллари шаҳрвандонро азхуд кардааст.
Акси марбута
Сурат: VisaSam.ru
Сокини шаҳри Душанбе ба қаллобӣ гумонбар дониста мешавад. Ӯ аз одамон пул гирифта, ваъда медодааст, ки ба онҳо ба Латвия раводид (виза) гирифта медиҳад.
Бино ба иттилои маркази матбуоти ВКД Тоҷикистон, як сокини пойтахт ба ШВКД-1 ноҳияи Шоҳмансур муроҷиат намуда, изҳор мекунад, ки моҳи декабри соли 2020 сокини 34-солаи шаҳр бо ваъдаи ба ӯ гирифта додани раводид ба Латвия 33,6 ҳазор сомонӣ маблағ гирифта, вале то ҳол на маблағашро барнагардонидаасту на раводид гирифтааст.
“Ҳамчунин ин шахс бо роҳи фиреб ба боварии ҷавони 26-солаи сокини шаҳри Душанбе даромада, барои гирифтани раводиди корт ба давлати Латвия аз ӯ 3 ҳазору 870-доллари амрикоӣ гирифта, то ҳол маблағашро барнагардонидааст”, - қайд мешавад дар хабари ВКД.
Зимнан зикр мегардад, ки “фурӯшанда”-и раводидҳо боздошт шуда, аз рӯйи ҳодисаҳои дар боло зикршуда тафтишот идома дорад.
