Ронанда дар назди шуъбаи пулис худро оташ зад

Сокини 38-солаи ноҳияи Хиваи вилояти Хоразми Узбекистон Хурсанд Бобоҷонов 20 феврал ба нишони эътироз ба амали кормандони БДА, ки мошини ӯро ғайриқонунӣ ҳабс кардаанд, дар рӯбарӯи бинои Шӯъбаи пулиси ноҳия худро оташ задааст.

Як манбаъ аз мақомоти умури дохилии Узбекистон гуфтааст, ронанда Бобоҷонов бо ин кораш хост, эътирози худро аз рафтори кормандони пулис нишон диҳад. Хурсанд Бобоҷонов бо сӯхтагии амиқ бистарӣ шудааст. 

Ба гуфтаи яке аз наздиконаш, Бобоҷонов барои дарёфти адолат ба шуъбаи пулис рафт.

"Ду рӯз пеш аз ҳодиса кормандони БДА мошини Бобоҷоновро гирифта, ба таваққуфгоҳ бурданд. Намедонам, миёни онҳо чи гузашт, вале ӯ гуфт, ки кормандони БДА мошинашро ғайриқонунӣ ҳабс кардаанд. 20 феврал Хурсанд шишаи бензинро гирифта, ба ШКД рафт. Корманди пулисро, ки дар ҳабси мошинаш даст дошт, ба берун даъват мекунад. Пас аз он ки гуфтугӯи онҳо бенатиҷа анҷом меёбад, ӯ бензинро нахуст ба сару рӯи худ ва баъдан ба корманди пулис мепошад. Вале корманди пулис тавонистааст, фирор кунад»,-афзудааст ӯ.

Корманди Раёсати умури дохилии Хоразм, ки худро муаррифӣ накард, худсӯзии Бобоҷоновро тасдиқ намуд, вале гуфт, хабарҳо дар бораи талоши ронанда барои оташ задани корманди пулис асос надоранд.

"То ҷое фаҳмидам, кормандони БДА Бобоҷоновро дар роҳ бозмедоранд ва чун мебинанд, ки ӯ дар ҳолати мастӣ пушти фармон нишастааст, мошинашро гирифта, ба таваққуфгоҳ мебаранд. Намедонам, ӯ барои чи худсӯзӣ кардааст. Шояд мехост, бозрасҳоро тарсонад", - илова кардааст ӯ.

Кормандони пулис тавонистаанд, сари вақт оташро хомӯш карда, Бобоҷоновро ба беморхона интиқол диҳанд.

Вазъи саломатии Хурсанд Бобоҷновро табибон вазнин арзёбӣ мекунанд. "65-70%-и баданаш сӯхта, вазъаш вазнин аст. ", - гуфт табиби Хоразм.

Дар робита ба ин ҳодиса бо моддаи "То ба худкушӣ расонидан" парванда боз шуда, қазияро Додситонии вилояти Хоразм санҷиш дорад.

назари худро нависед
Қаҳрамонҳои Тоҷикистон