КҲФ: ҳолати тармафароӣ 4 рӯзи дигар идома мекунад


Тавре Кумитаи ҳолатҳои фавқулода ва мудофиаи граждании

назди Ҳукумати Ҷумҳурии Тоҷикистон хабар дода буд, аз 28 то 30-юми январи соли ҷорӣ эҳтимолияти лағзиши тарма дар навоҳии ВМКБ, қаторкӯҳҳои Ҳисор, роҳҳои мошингарди Душанбе-Хоруғ, Душанбе-Хуҷанд, Душанбе-Ҷиргатол, Хоруғ-Мурғоб, Хоруғ-Ишкошим боқӣ мемонад. Ҳамин тавр, 28-уми январи соли 2017 дар роҳи Ишкошим-Хоруғ, Ваҳдат-Рашт-Ҷиргатол ва махсусан дар роҳи Душанбе-Хуҷанд фаромадани тарма ба қайд гирифта шуд. Дар натиҷаи фаромадани тарма дар ВМКБ 2 нафар шаҳрванд ба ҳалокат расиданд. Дар натиҷаи фаромадани 40 тарма ва боришоти барфи пуршиддат роҳи Душанбе-Хуҷанд маҳкам аст, бештар аз 200 мошин дар муҳосираи тармаву ғарами барф монданд. Барои ташкили кор ҷиҳати интиқоли одамон ва овардани онҳо то макони бехатар гурӯҳи кории Кумитаи ҳолатҳои фавқулода созмон дода шуд. Дар натиҷаи роҳандозии корҳои наҷот аз 28 то 29-уми январ наздик ба 800 нафар одамон ва 50 мошини боркашу 150 мошини сабукрав макони амн интиқол дода шуд. То бегоҳии 29-уми январ наҷотдиҳандагони Кумита аз ҷарии 150 метр 4 ҷасад ва аз мошин 1 ҷасадро ёфтанд. Барои тоза кардани роҳи мошингард ва бартарафсозии оқибатҳои офат Хадамоти роҳи ширкати Innovative Road Solutions (IRS) 6 адад техникаро аз ду тараф сафарбар намуд. Дар ҷойи тарма барои таъмини бехатарии одамон постгоҳҳои иловагӣ аз ҳисоби кормандони БДА ва Хадамоти роҳи ширкати IRS гузошта шуданд. Ҳолати вазнин ҳамоно дар роҳи мошингарди Душанбе-Хоруғ-Мурғоб ҳукмфармост. Бар асари резиши барф ва лағзиши тарма дар қаламрави ноҳияҳои Рӯшон, Шуғнони ВМКБ роҳҳо баста шудаанд. Ситоди бартарафсозии оқибатҳои офат, ки ахиран созмон дода шуд, шабонарӯз фаъолият мекунад. Дар ин иртибот Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон аз аҳолӣ ва меҳмонони кишвар қатъиян хоҳиш мекунад, ки аз сафар намудан ба ин мавзеъҳо муваққатан худдорӣ намоянд ва ҷонӣ худ ва ҷони наздикони худро ба хатар наяндозанд. Ҳолати тармафароӣ боз 3-4 рӯзи дигар идома хоҳад кард. 

назари худро нависед
Қаҳрамонҳои Тоҷикистон