Марказҳои тестии Русия дигар аз муҳоҷирон имтиҳон қабул намекунанд. Акнун дар куҷо ва чӣ хел онро бояд супорид?

2-05-2024, 08:09 |

Даҳҳо марказҳои тестӣ дар шаҳрҳои Русия дигар аз муҳоҷирон имтиҳон аз забони русиро қабул намекунанд. Бо фармоиши Вазорати маориф ва илм, аз 1 майи соли 2024 акнун ба қабули имтиҳон танҳо донишгоҳҳо ҳуқуқ доранд.
Дар ҳамин ҳол, бидуни супоридани ин имтиҳон шаҳрвандони хориҷӣ наметавонанд патенти корӣ ё ҳуҷҷати иҷозаи зист (ВНЖ) гиранд.
Вазорати маориф ва илми Русия бар ин назар аст, ки маҳдудияти мазкур ва чораҳои андешида ба тақвияти назорат аз болои сифати баргузории имтиҳонҳо барои шаҳрвандони хориҷӣ имкон медиҳанд.
“Азия-Плюс” аз ҳомии ҳуқуқ Валентина Чупик, ки ба муҳоҷирони кори бепул машварати ҳуқуқӣ медиҳад, дархост намуд, ки дар бораи акнун дар куҷо ва чӣ хел супоридани имтиҳонҳо маълумот диҳад.

Аз куҷо метавон рӯйхати донишгоҳҳоеро дарёфт, ки имтиҳон қабул мекунанд?

Айни замон дар Русия 12 донишгоҳи ваколатдор ба қабули имтиҳон аз хориҷиён ва як ташкилоти назди ҳукумати Маскав мавҷуд аст. Рӯйхати ин мактабҳои олӣ дар портали зерин қобили дарёфт аст.
Қобили зикр аст, ки донишгоҳҳо худашон имтиҳон қабул намекунанд. Барои ин дар қаламрави муассиса маркази ҷудогонаи тестӣ ҳаст.

Сурат: mmcentre24

Агар дар шаҳре, ки ман дар он қарор дорам, донишгоҳ барои қабули имтиҳон набошад чӣ?

Ҳатто агар дар шаҳр донишгоҳи зарурӣ набошад ҳам, марказҳои тестии донишгоҳҳо ҳамеша дар маркази ваколатдори муҳоҷират амал карда, дар он ҷо патент ҳам медиҳанд.

Ин имтиҳонҳо пулакианд?

Бале, имтиҳонҳо аз забони русӣ барои шаҳрвандони хориҷӣ пулакианд.
Масалан, дар Маркази муҳоҷирати Маскав (МБМ Сахарово) аз ҳама арзонтар аст - 1350 рубл, дар Донишкадаи забоншиносии Маскав бошад - 10200 рубл. Нархи миёнаи он 4000 рублро ташкил медиҳад.

Аз куҷо нархи имтиҳонро дар ин ё он донишгоҳ фаҳмидан мумкин аст?Ин маълумот маъмулан дар сомонаи донигоҳҳо дастрас аст. Дар ҳамин ҳол, нархи имтиҳон ба таъиноти гувоҳнома (сертификат) вобаста мебошад.

Барои гирифтани патент нархи имтиҳон арзонтар аст, барои гирифтани Иҷозаи зисти муваққатӣ (РВП), Ҳуҷҷати иҷозаи зист (ВНЖ) ё шаҳрвандӣ - қиматтар.
Маблағро метавон тариқи расид (квитансия) дар бонк ё бо пули нақд тавассути дастгоҳи хазина (касса)-и маркази тестӣ пардохт намуд.

Тестгирӣ чӣ хел мегузарад? Пешакӣ ба он тайёр шудан мумкин аст?

Тайёршавӣ бефоида аст. Дар имтиҳонҳо фаҳмиши умумии нутқ, захираи калимаҳо ва донишҳои одиро месанҷанд. Дар ҳамин ҳол, душвории имтиҳон аз забон барои шаҳрванди хориҷӣ ба таъиноти гувоҳнома (сертифиат) вобаста аст: барои гирифтани патенти корӣ, зисти муваққатӣ (РВП), Ҳуҷҷати иҷозаи зист (ВНЖ) ё шаҳрвандӣ.
Масалан, зимни гирифтани сертификат барои патент хондан ва нақли матн аз 15 сатр лозим аст. Ҳамчунин аз шумо хоҳиш мекунанд, ки ба саволҳо дар бораи тарҷумаи ҳолатон ҷавоб диҳед (кай ва дар куҷо таваллуд шудаед, дар куҷо таҳсил кардед, кай мактабро хатм кардед).

Дарси забони русӣ дар мактаби шабона барои муҳоҷирони корӣСурат: ТАСС

Метавонад саволҳои одӣ ҳам аз рӯзгор бошад, масалан чӣ гуна пардохт намудани роҳкиро дар метро, дар куҷо нон харидан чанд рӯз пеш омадед, фарзандонатон ба мактаб мераванд ё не, президенти Русия кист, Конститутсия чист, дар чароғаки сурх аз роҳ гузаштан мумкин аст ва ғайра.

Имтиҳонро дарҳол пас аз омадан ба Русия супоридан лозим аст? Ягон муҳлат ҳаст?

Сертификати тасдиқкунандаи донистани забони русӣ барои гирифтани патенти корӣ лозим аст. Онро шаҳрванди хориҷӣ бояд дар муддати 30 рӯз аз замони вуруд ба Русия ба расмият дарорад.
Яъне тақрибан пас аз ду ҳафтаи омадан ҳуҷҷатҳоро барои гирифтани патент пешниҳод кардан лозим аст. Маҳз барои ҳамин бояд аз тестгирӣ гузаштан даркор аст.
Хуллас, кӯшиш кардан лозим аст, ки имтиҳонро дар муддати ду ҳафтаи пас аз вуруд ба қаламрави Русия супоред.

Агар дар дафъаи аввал имтиҳонро супорида натавонем, такроран аз тест гузаштан мумкин аст?

Шумо чанд боре, ки хоҳед, метавонед имтиҳон супоред. Дар ҳамин ҳол, ҳар дафъа маблағи онро супоридан лозим меояд.
Ва ба назар гирифтан лозим аст, ки барои гирифтани патенти корӣ муҳлатҳои муайян муқаррар шудаанд.
Масалан, дар сомонаи Сарраёсати тафтишоти Кумитаи тафтишот дар вилояти Маскав гуфта мешавад, агар шумо патент нагирифтаед, таҳсилро оғоз накардед ё иҷозаи зист дар Русияро дарёфт накардаед, пас аз 90 шабонарӯз (муҳлати аввали бақайдгирии муҳоҷират) бояд ба ватан баргардед.
Шумо танҳо баъди 90 шабонарӯз дубора ба Русия рафта метавонед. “Хориҷ шудану ворид шудан” кардан лозим нест, зеро ин вайрон кардани қонунгузории муҳоҷират шуморида мешавад. Барои ин вуруд ба Русия ба муҳлати 5 сол манъ мешавад.

АХБОРИ ОҶИЛ