ВИДЕОИ БОЗПУРСИИ ЖАСУРЖОН УСМОНОВ: Ӯ БА ГАРДАН ГИРИФТ, КИ УСТОДИ АКАДЕМИЯИ ПЛЕХАНОВ ВА МОДАРАШРО БАРОИ 20 ҲАЗОР РУБЛ КУШТААСТ
ВКД Русия видеои бозпурсии шаҳрванди 26-солаи Тоҷикистон Жасуржон Усмонов, гумонбари асосӣ дар қатли ду зан дар ноҳияи Солнечногорски вилояти Маскавро нашр кард. Усмонов ба ин занҳо дар сохтмони қабати сеюми хиштин дар болои ду қабати чӯбии хонаашон кумак мекард.Усмонов дар ҷараёни бозпурсӣ қатли он ду занро ба гардан гирифт ва гуфт, корфармоёнашро барои он кушт, ки 20 ҳазор рубл ҳаққи корашро надоданд.
Усмонов гуфт, шоми 7 ноябр ба деҳаи Клушино барои гирифтани ҳаққи кораш омад, вале соҳибхонаи 67-сола ба далели гӯё бад будани сифати кораш аз додани ҳаққи кори Усмонов саркашӣ кардааст. Усмонов ба хашм омада, бо корде, ки аз ҳамон хона пайдо кард, ин зани солхӯрдаро кордборон кардааст. Садои фарёди модарашро шунида, досенти Академияи иқтисодии ба номи Плеханов Виктория Борковская давида, меояд ва ӯ ҳадафи дуюм мешавад. Қотил духтари шашсолаи Борковскаяро низ чанд кор мезанад, вале ӯ зинда монда, соати 21.50 аз телефони модараш ба як шиноси ӯ занг зада, бо овози гирён хабар додааст, ки модару бибияш ғарқи хун хобидаанд ва ӯ худаш ҳам маҷруҳ шудааст. Кӯдак аз шиноси модараш хостааст, ки барояшон дока биорад. Он дӯсти Борковская рост ба пулис ва «Ёрии таъҷилӣ» занг задааст, вале вақте кормандони пулис ва «Ёрии таъҷилӣ» ба ҷои ҳодиса расиданд, ҷасадҳои пур аз захми корд ва ба хун оғӯштаи Виктория Борковская ва модари 67-солаи ӯ ва ҳамчунин духтари 6-солаи аз қафаси сина ва гарданаш захмишудаи Борковскаяроро пайдо карданд.
Билофосила ангушти иттиҳом ба сӯи Жасуржон Усмонов, ки дар хонаи Борковская мардикорӣ мекард, баланд шуд в аӯро шаби 10 ноябр аз як сохтмон дар яке аз деҳаҳои ноҳияи Дмитрови вилояти Маскав пайдо карданд. Муфаттишон ҷоеро, ки Усмонов либосҳои хунолудашро оташ зада буд, пайдо карданд ва ҳамчунин кроссовкиҳои сафеди хунолудеро, ки ӯ он шаб дар пой дошт. Дар сабти камераҳои назоратӣ дида мешавад, ки чӣ гуна ӯ ҳамон шаби куштор дар пой чунин кроссовкиҳои сафед аз ҷои ҳодиса фирор мекунад.
Муайян кардаанд, ки Жасуржон Усмонов қаблан ҳам бо ҷурми ғоратгарӣ маҳкум ба зиндон шуда буд. Ӯ ба дӯстонаш гуфта будааст, ки баъди гирифтани пули кораш ба Тоҷикистон бармегардад. Вале зоҳиран акнун бозгашти ӯ хеле ба таъхир меафтад. Ба ӯ бар асоси қисми дуюми моддаи 105-уми Кодекси ҷиноятии Русия барои куштани ду нафар ва қасди куштори кӯдак то 20 соли зиндон ва ҳатто ҳабси умрбод таҳдид мекунад.
