Ошкор гардидани амалҳои мардумфиребӣ
Зимни баргузор намудани чорабиниҳои оперативӣ-ҷустуҷӯӣ аз ҷониби кормандони милитсия мардони 39 ва 42-солаи сокинони шаҳри Исфара бо гумони содир намудани кирдори қаллобӣ дастгир карда шуданд.Номбурдагон, моҳи июли соли 2019 бо роҳи фиреб ба боварии марди 36-солаи сокини шаҳри Душанбе даромада, бо баҳонаи аз Федератсияи Россия дастрас намудани 2-адад автомашинаи тамғаи «Тайота-Кемри» аз ӯ 51 ҳазор доллари амрикоӣ гирифта, то ҳол маблағашро барнагардонидаанд.
Нисбати гумонбаршавандагон парвандаи ҷиноятӣ бо моддаи 247 қисми 4 Кодекси ҷиноятии Ҷумҳурии Тоҷикистон оғоз гардида, тафтишот идома дорад.
Инчунин, дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 25-солаи сокини ноҳияи Кӯшониён ҳамчун гумонбар дар содир намудани кирдори қаллобӣ дастгир карда шуд.
Номбурда бо роҳи фиреб ба боварии ширкати “Рентакарт” даромада, рӯзи 20-уми январи соли 2021, аз ширкати мазкур автомашинаи тамғаи “Тайота-Кемри-2”-ро, ба муҳлати 2-шабонарӯз иҷора гирифта, 22-юми январи соли 2021, ҳангоми дар ноҳияи Кӯшониён, қарор доштанаш ба ҷавони 26-солаи сокини ноҳияи мазкур автомашинаи шахсии худ гуфта, гарав монда, бар ивазаш 48 ҳазор сомонӣ гирифта, ғайб задааст.
Нисбати гумонбаршаванда парвандаи ҷиноятӣ бо моддаи 247 қисми 3 Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.