Давлатзода: Калисои протестантӣ барои сабти ном муроҷиат накардааст
Раиси Кумитаи дин мегӯяд, пайравони равияи протестантӣ барои сабти номи калисо дар Тоҷикистон расман муроҷиат накардаанд. Кумисюни байнулмилалии Амрико дар мавриди озодиҳои динӣ (USCIRF) дар гузориши наваш рӯзи 1-уми май навишт, мақомоти Тоҷикистон ба сабтиноми як калисои протестантӣ посухи рад додаанд.Аммо Сулаймон Давлатзода, раиси Кумитаи дин 1-уми август зимни нишасти хабарӣ гуфт, давоми ду соли ахир ягон гуруҳи протестантӣ барои сабти ном ба ин ниҳод муроҷиат накардааст. Давлатзода афзуд, агар пайравони ин равия муроҷиат кунанд, дар доираи қонун барояшон посух медиҳанд.
Маълум нест, ки Кумисюни байнулмилалии Амрико дар мавриди озодиҳои динӣ иттилоъ дар бораи радди дархости ҷамъияти протестантҳоро аз куҷо гирифтааст. Раиси Кумитаи дини Тоҷикистон 1-уми август батакрор гуфт, аз пайравони ин равияи дини масеҳӣ муроҷиате нагирифтаанд.
Дар Тоҷикистон 66 иттиҳодияи динии ғайриисломӣ фаъол аст. Тақрибан чаҳор ҳазор масҷиди панҷвақта, ҷомеъ ва ҷомеаи марказӣ низ фаъолият мекунанд.
