Додситонии Хатлон 200 корманди мақомоти ҳифзи ҳуқуқро ҷазо додааст
Чанде пеш Эмомалӣ Раҳмон аз фаъолияти ниҳодҳои ҳифзи ҳуқуқи ин вилоят ба таври бесобиқа интиқод карда, дастури барканории роҳбарони онҳоро дода буд.
Дар ин бора Аваз Назарзода, додситони навтаъини вилояти Хатлон зимни нишасти матбуотӣ хабар дод.“Зимни санҷишҳои прокурорӣ 353 ҳолатҳои аз қайд пинҳон кардани ҷиноят ошкор карда шуд. Баъди тафтиши ҷиноятҳои пинҳонкардашуда 140 парвандаи ҷиноятӣ боз шуда, баъди ба анҷом расидани тафтишоти пешакӣ, барои баррасӣ ба суд ирсол гардид”, - гуфт Аваз Назарзода.
Аммо ӯ аз ҳеҷ як корманди мақомоти ҳифзи ҳуқуқ ном набурд ва ҳам шарҳ надод, ки кадом навъи ҷиноятҳо пинҳон карда шудаанд.
Дар умум, ба қавли Аваз Назарзода, соли 2023 дар вилояти Хатлон 5 ҳазору 903 ҷиноят ба қайд гирифта шудааст, ки дар қиёс ба соли 2022 443 ҷиноят ё 7 дарсад камтар аст.
![](https://asiaplustj.info/sites/default/files/articles/333794/%D0%90%D0%B2%D0%B0%D0%B7%20%D0%9D%D0%B0%D0%B7%D0%B0%D1%80%D0%B7%D0%BE%D0%B4%D0%B0.jpg)
“Сатҳи пасти касбӣ, ноуҳдабароӣ нисбат ба иҷрои вазифаҳои хизматӣ, роҳ додан ба ҳолатҳои коррупсионӣ, зиёд шудани ҷиноятҳои дорои хусусияти экстремистиву террористӣ, қочоқи маводи мухаддир, даст задани баъзе кормандони мақомоти ҳифзи ҳуқуқ, назоратӣ ва сохторҳои низомӣ ба қочоқи маводи нашъаовар ва молу маҳсулот, ба кор қабул намудани шахсони тасодуфӣ ва ғайрикасбӣ дар сафҳои мақомот, интихобу ҷобаҷогузории нодурусти кадрҳо аз ҷониби роҳбарони мақомот аз масъалаҳои муҳиме буданд, ки дар ҷаласаи Шурои амният мавриди муҳокимаи ҷиддӣ қарор гирифтанд”, - гуфта мешуд дар хабари хадамоти матбуоти президент.
Дар пайи ин чандин роҳбари мақомоти ҳифзи ҳуқуқи вилояти Хатлон иваз шуданд. Аз ҷумла, сардорони раёсати ВКД, раёсати КДАМ, додситонии вилоят, раёсати Агентии зиддифасод аз вазифаҳои худ маҳрум шуда, ба ҷойи онҳо нафарони нав таъин гардиданд.