Русия муҳлати иқомат барои шаҳрвандони Ӯзбекистонро тамдид кард
Дар як нишаст дар Думаи давлатӣ созишномаи Русия ва Ӯзбекистон дар бораи сабти иқомати шаҳрвандони дувумӣ дар тӯли 15 рӯз аз рӯзи вуруд ба кишвари аввалиро тасвиб кард.
Ин ҳуҷҷат 21 майи соли 2021 дар Маскав ва 17 июни соли 2021 дар Тошканд ба имзо расида буд.
"Шаҳрвандони як давлати дигар, ки муваққатан дар қаламрави давлати дигар иқомат доранд, аз уҳдадории ба қайд гирифтан дар мақомоти салоҳиятдори давлати пазиранда дар давоми 15 рӯз аз рӯзи ворид шуданашон озод карда мешаванд", - омадааст дар ин ҳуҷҷат.
Қаблан ин муҳлат барои муҳоҷирон аз Ӯзбекистон дар Русия ҳафт рӯз ва дар Ӯзбекистон барои русиягиҳо се рӯз буд.
Тартиби вуруди шабеҳ ба ин дар ҳоли ҳозир барои шаҳрвандони як қатор кишварҳо амал мекунад.
Ба рӯйхати чунин давлатҳо Беларус, Қазоқистон, Тоҷикистон, Арманистон ва Қирғизистон дохил мешаванд.
Ба гуфтаи муаллифони ин ташаббус, ҷорӣ шудани қоидаҳои нав барои муҳоҷирон ба теъдоди вуруди шаҳрвандони Ӯзбекистон ба қаламрави Русия таъсир намерасонад.
Дар тавзеҳи созишнома ҳамчунин гуфта мешавад, ки тасвиби ин санад назорати давлатии федералӣ дар заминаи муҳоҷират, иқомат ва будубоши шаҳрвандони хориҷӣ дар Русияро коҳиш нахоҳад дод.
Дар он ҳамчунин гуфта мешавад, ки чунин иқдом ба рушди минбаъдаи муносибатҳои дӯстонаи Русия ва Ӯзбекистон мусоидат мекунад.
Сарчашма:Sputnik
