РЕН ТВ: Русия 4 ҷинояткори хавфнокро ба ихтиёри Тоҷикистон медиҳад
Дар Прокуратураи генералии Тоҷикистон барои маълумот дар ин хусус дархости расмӣ талаб карданд.
Сурат: скриншот аз навори видеои шабакаи телевизиони РЕНТ ТВПрокуратураи генералии Русия тасмим гирифт, ки 4 нафар шаҳрвандонро, ки дар содир намудани як қатор ҷиноятҳо дар қаламрави Тоҷикистон гумонбар дониста мешаванд, ба ихтиёри Тоҷикистон медиҳад. Дар ин бора шабакаи телевизиони РЕН ТВ хабар медиҳад.
Шабакаи телевизионӣ бо истинод ба Прокуратураи генералии Русия иттилоъ медиҳад, ки яке аз гумонбаршудагон соли 2009 дар Душанбе ба шаҳрванди Чин дарафтода, 26 ҳазор доллари ӯро ғорат кардааст.
“Ҳамин шахс якҷоя бо ҳаммаслакаш бо истифода аз арматура ва корд як нафарро куштааст, зеро намехост, ки 4 ҳазор доллар қарзро ба ӯ баргардонад”, - иттилоъ медиҳад РЕН ТВ.
Ба иттилои манбаъ, боз як гумонбаршаванда дар ғайриқонунӣ харидану интиқол ва нигаҳдории маводи мухаддир даст дорад.
“Гумонбаршавандаи сеюм ҳангоми кор ба сифати хазинадор 171 билетҳои ҳавопаймоиро бо нарх барои калонсолон фурӯхта, лекин дар ҳуҷҷатҳо фурӯши онҳоро бо нархҳои имтиёзнок барои ноболиғон нишон додааст ва маблағи фарқияти нархҳоро барои худ гирифтааст, - иттилоъ медиҳад манбаъ. - Марди чорум соли 2015 аз хонаҳои мардум чизу чора ва амволи онҳоро медуздидааст”.
Гуфта мешавад, ба туфайли ҳамкории муштараки Прокуратураҳои генералии ҳар ду кишвар дар мавриди истирдоди ин нафарон созиши мусбат ҳосил шуд.
Дар Прокуратураи генералии Тоҷикистон ин маълумотро ба “Азия-Плюс” тасдиқ ҳам накарданду инкор низ, лекин талаб намуданд, ки барои посух ба саволҳоямон дар мавриди итирдоди онҳо дархости расмӣ пешниҳод кунем.
