Назруллоҳ Абдулваҳҳобов, Корманди шоистаи Тоҷикистон, ки аз соли 1995 то 2004 раҳбари дастгоҳи парлумони Тоҷикистон буд, рӯзи 7 майи соли 2022  дар синни 84 аз олам чашм пӯшид.

Маросими ҷанозаи марҳум рӯзи 8 май дар шаҳри Кӯлоб баргузор шуд.

Назруллоҳ Абдулваҳҳобов 10 майи соли 1938 дар ноҳияи Кангурт таваллуд шуда, мактаби 7-солаи ба номи Пайрав Сулаймониро дар зодгоҳаш ва сипас соли 1957 мактаб-интернати Кангурт ва соли 1962 риштаи физика ва математикаи Донишкадаи давлатии омӯзгории Кӯлобро хатм кардааст.

Назруллоҳ Абдулваҳҳобов дар тӯли собиқаи кориаш ба ҳайси муаллими мактабҳои миёнаи н. Данғара (1962-1966), инструктори шуъбаи ташкилии ҳизби коммунисти н. Данғара (1966-1969), котиби комиҷрояи н. Данғара (1969-1972) кор карда, солҳои1972-1974 дар Мактаби олии ҳизбии КПСС дар ш. Тошканд таҳсил кардааст. Баъди хатми мактаби ҳизбӣ ӯ дар мақомҳои  котиби комиҷрояи Шӯрои намояндагони халқи в. Кӯлоб (1974-1987), намояндаи Шӯрои вазирони СССР оид ба дин дар в. Кӯлоб, мудири шуъбаи кадрҳои Идораи хизмати маишии ш. Кӯлоб, сардори Дастгоҳи ҳукумати в. Хатлон дар минтақаи Кӯлоб (1987-1995) фаъолият дошт.

Назруллоҳ Абдулваҳҳобов сипас дар мақомҳои роҳбари Дастгоҳи Шӯрои Олии ҶТ (1995-2000), роҳбари Дастгоҳи Маҷлиси намояндагони МО ҶТ (2000-2004), сардори Раёсати хоҷагӣ-маъмурии дастгоҳи Вазорати алоқаи ҶТ (2005-2007) ва муовини раиси Ҳаракати ваҳдати миллӣ ва эҳёи Тоҷикистон (2007-2010) кор кардааст.

Ӯ бо медалҳои «Барои меҳнати шоён» (1970), «Барои меҳнати шуҷоатнок» (1986) мукофотонида шудааст.

Муаллифи беш аз 10 китобҳои қиссаву достонҳо аз ҳаёти мардуми Тоҷикистон мебошад.