МУРДА БУДАМ, ЗИНДА ШУДАМ. НАШРИ ВИДЕОИ ЯК МУТТАҲАМИ АСОСӢ ДАР ҚАТЛИ БОНКДОР ИСМАТУЛЛОЕВ
МУРДА БУДАМ, ЗИНДА ШУДАМ. НАШРИ ВИДЕОИ ЯК МУТТАҲАМИ АСОСӢ ДАР ҚАТЛИ БОНКДОР ИСМАТУЛЛОЕВ
Додситонии кулли Тоҷикистон рӯзи 6 сентябри соли 2023 видеои Акбар Ахмедов, як муттаҳами асосӣ дар қатли бонкдори тоҷик Шуҳрат Исматуллоевро нашр кард. Қаблан хабарҳое нашр шуд, ки Акбар Ахмедов дар боздоштгоҳ ҷон бохтааст ва ӯро дар як оромгоҳ дар Хуҷанд ба хок супурдаанд. Ин хабар аз як суҳбати Дилшод Саидмуродов, мулақабб ба “Дилшоди Красавчик” ва “Дилшоди СБ” бо як роҳбари мухолифин бархоста буд, вале радиои оилавии зану шавҳар Аюбовҳо (собиқ Радиои Озодӣ) ин хабарро бо такя ба гӯё “се манбаъ” нашр кард.
Додситонии кулли Тоҷикистон хабари нашркардаи ин радио дар хусуси фавти яке аз аъзои гурӯҳи муташаккили ҷиноятӣ марбут ба рабудан ва куштори муовини аввали роҳбари ҶСК «Ориёнбонк» Исматуллоев Ш.А. - Ахмедов Акбар Акрамович дар боздоштгоҳи шаҳри Душанбе ва боздошти модари ӯро “мақолаҳои нодуруст” ва “хабари бардурӯғ” номида, гуфт: “Ахмедов А.А. бо парвандаи ҷиноятии мазкур дастгир гардида, нисбаташ чораи пешгирӣ дар намуди ба ҳабс гирифтан татбиқ ва номбурда дар тавқифгоҳи тафтишотӣ қарор дорад. Аммо намояндагии «Радиои Аврупои Озод»/ «Радиои Озодӣ» дар Ҷумҳурии Тоҷикистон талаботҳои қонунгузориро дағалона вайрон намуда, бархилофи талаботи моддаҳои 14 ва 29 Қонуни Ҷумҳурии Тоҷикистон «Дар бораи матбуоти даврӣ ва дигар воситаҳои ахбори омма» маводи бардурӯғ нашр намудаанд. 5 сентябри соли 2023 ба намояндагии «Радиои Аврупои Озод»/ «Радиои Озодӣ» дар Ҷумҳурии Тоҷикистон ҷиҳати бартараф намудани вайронкунии Қонуни мазкур амри хаттӣ дода шуд”.
Амри хаттӣ, ки бо имзои додситони кулли Тоҷикистон ба дафтари радио фиристодаанд, ба маъноест, ки дар қадами баъдӣ метавонистанд дафтари Озодиро дар Тоҷикистон бубанданд.
радиои оилавии зану шавҳар Аюбовҳо (собиқ Радиои Озодӣ) рӯзи 6 сентябр расман аз модари Акбар Ахмедов ва аҳли хонадони ӯ барои нашри хабари иштибоҳӣ маъзарат хост.