ТВ «Варзиш» яксола шуд


Муассисаи давлатии телевизиони «Варзиш» 1-уми марти соли 2016

аз ҷониби Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар якҷоягӣ бо Муассисаи давлатии телевизиони «Синамо» ва Академияи воситаҳои ахбори омма ба фаъолият оғоз намуд. Дар тӯли як соли фаъолияти худ ТВ «Варзиш» ҳамчун як шабакаи нави телевизионии ватанӣ ҳарчанд таҷриба надошт, вале тавонист як қатор корҳоро ба сомон расонад. Аз ҷумла, ТВ «Варзиш» тавонист ҳуқуқи пахши расмии мусобиқаҳои байналмилалиро, аз қабили чемпионатҳои футболи қитъаи Аврупо, Англия, Испания, Италия ва Олмонро ба даст орад. Ҳамзамон бори аввал дар таърхи шабакаҳои ватанӣ ҳуқуқи пахши расмии бозиҳои олимпӣ ва акредитатсияи ду хабарнигори муассисаро расман ба даст овард, ки онҳо ба тамоми он варзишгоҳҳо ва манотиқе, ки бозиҳои олимпии 31-уми тобистонаи соли 2016 баргузор гардиданд ҳуқуқи иштирок ва инъикосро пайдо намуданд. Яке аз мақсадҳои асосии ташкил намудани Муассисаи давлатии телевизиони «Варзиш»- ин тарғибу ташвиқи тарзи ҳаёти солим буд. Шабакаи мазкур дар формати HD манзури тамошобинон мегардад, ки дар як муддати кӯтоҳ мухлиси худро пайдо намуд. Бояд хотиррасон намуд, ки шабакаи «Варзиш» ба моҳвора пайваст аст ва географияи тамошобинони он хеле фарох аст. 

назари худро нависед
Қаҳрамонҳои Тоҷикистон