Мутахассиси амрикоӣ: Кӯҳҳои Тоҷикистон сатҳи бемории COVID-19-ро паст мекунанд
Ораши Алоӣ бар ин назар аст, ки дар он ҷо масофаи иҷтимоӣ беҳтар риоя мешавад.
Доктор Ораши Алоӣ
Сурат: mv.ecuo.org
Сатҳи пасти гирифторӣ ва маргумир дар Тоҷикистон аз COVID-19 ба он далел робита дорад, ки Тоҷикистон кишвари кӯҳсор аст ва ҷойҳои издиҳом дар он кам вуҷуд доранд, изҳор доштааст зимни семинар-машварати онлайнӣ оид ба пешгирӣ ва муолиҷаи бемории COVID-19 табиби эрониасли амрикоӣ, роҳбари Пажӯҳишгоҳи байнулмилалии саломатӣ ва омӯзиши ИМА дар шаҳри Ню-Йорк доктор Ораши Алоӣ.
Бино ба иттилои дафтари матбуоти Вазорати тандурустӣ ва ҳифзи иҷтимоии аҳолии ҷумҳурӣ, дар кори семинар-машварат муовинони вазири тандурустӣ, роҳбарони муассисаҳои тандурустӣ ва табибоне, ки бевосита гирифторони коронавируси нави COVID-19-ро табобат мекунанд, иштирок карданд.
Гуфта мешавад, доктори амрикоӣ ин ақидаи худро чунин шарҳ додааст, ки чун аксар мардуми Тоҷикистон дар кӯҳистон зиндагӣ мекунанд, дар он ҷойҳо метавон фосилаи иҷтимоиро ба хубӣ риоя кард.
Ораши Алоӣ зимни семинар изҳор доштааст, ки яке аз роҳҳои пешгирии ин беморӣ дар нақлиёти ҷамъиятӣ ва хона пайваста тирезаҳоро боз намудан буда, ин омил метавонад ҷиҳати сироят нашудани шаҳрвандон ба бемории мазкур мусоидат намояд.
Ӯ ҳамчунин таъкид доштааст, ки риояи ҳатмии реҷаи ниқоб низ дар самти пешгирии бемории коронавируси нави COVID-19 хеле манфиатбахш ва ҳарчи бештар фаҳмонидани масъалаи мазкур ба мардум муҳим аст.
Бино ба маълумоти Вазорати тандурустӣ, то субҳи 9 декабр шумори сироятёфтагон аз коронавирус дар Тоҷикистон 12 ҳазору 511 нафарро ташкил дод. Аз оғози пандемия то ин дам 11 ҳазору 926 нафар ё худ 95,3% аз ин беморӣ шифо ёфта, 88 нафар фавтиданд.
