ТАҒЙИРОТИ БАҲСБАРАНГЕЗ БА ҚОНУНИ АМНИЯТ БЕКОР КАРДА ШУД


Маҷлиси намояндагон иловаҳо ба қонун дар бораи амнияти миллиро, ки ба кормандони амният ҳаққи бидуни иҷозат даромадан ба манзилҳои мардум дар ҳолати таҳдиди ҳамлаи террористиро медод, бекор кард. Ин тағйиротро қаблан Маҷлиси миллӣ қабул накард.

Маҷлиси намояндагон – палатаи поёнии парлумони Тоҷикистон бидуни муҳокима ва якдилона тағйиротеро, ки моҳи октябри соли 2016 ба "Қонун дар бораи мақомоти амнияти миллӣ” ворид карда буд, бекор кард.

Бино ба гузориши "Азия Плюс”, раиси Маҷлиси намояндагон Шукурҷон Зуҳуров рӯзи 30 июн бидуни тавзеҳи сабабҳо ба вакилон пешниҳод кард, ки ин тағйирот бекор карда шавад. Вакилони парлумон низ якдилона аз ин пешниҳод дастгирӣ кардаанд.

Тағйирот ба қонуни амнияти миллӣ боиси баҳсзои зиёде дар ҷомиа ва ҳам дар доираҳои сиёсии Тоҷикистон шуда буд. Як манбаи "Азия Плюс” дар ҳукумати Тоҷикистон бидуни ироаи ҷузъиёт гуфтааст, "маълум шуд,ки ҳангоми қабули он тағйирот ба баъзе ҳолатҳои поймол кардани ҳуқуқи шаҳрвандон роҳ дода шудааст.”

СаймӯъминЯтимов, раиси Кумитаи давлатии амнияти миллии Тоҷикистон, моҳи октябр ҳангоми муаррифии ин тарҳи қонун дар порлумон гуфта буд, "таҷрибаи ҳодисаҳои террористӣ дар Афғонистон, Покистон ва кишварҳои Ховари Миёна нишон доданд, ки ин гурӯҳҳо ба таври махфиёна амал мекунанд ва ин рафтори онҳо посухи баробарвазн мехоҳад. Яъне, махфиёна ба манзилҳое рафтан, ки дар он ҷо террористҳо мехоҳанд амали ҷиноятии худро содир кунанд.”

Ятимов гуфт, ин қонун "дар навбати аввал ба таъмини амнияти шахс, ҷамъият ва давлат равона карда шудааст”ва афзуд, "бидуни иҷоза ба манзилҳои шахс ворид шудан масъулияти бузургро талаб мекунад ва танҳо дар ҳолатҳои фавқулода амалӣ мешавад. Кормандони амнияти миллӣ бояд интихобан амал карда ва мақсадҳои гузоштаро иҷро кунанд. Ин таҷриба дар кишварҳои ҷаҳон роиҷ аст."

Аммо моҳи феврали соли ҷорӣ Маҷлиси миллӣ – палатаи болоии парлумони Тоҷикистон – тағйироти аз сӯи Маҷлиси намояндагон пазируфташуда ба қонун дар бораи мақомоти амнияти миллиро қабул накард. Вакилони Маҷлиси Миллӣ гуфтанд, ки дар қонун мушаххас нашудааст, кидар кадом ҳолат кормандони ҳифзи ҳуқуқ ва амният ҳақ доранд, бе иҷоза ба манзили шаҳрвандон ворид шаванд.

Маҳмадсаид Убайдуллоев, раиси Маҷлиси Миллӣ, бо ин далел ки "дар инҷо масъалаи кафолати амнияти шаҳрвандон ва ҳифзи ҳуқуқи онҳо матраҳ аст", ба раиси Додгоҳи олӣ, Додситонии кулл ва Кумитаи давлатии амнияти миллӣ дастур дод, ки ин қонунро бозбинӣ кунанд.

назари худро нависед
Қаҳрамонҳои Тоҷикистон