Рӯзи 20 июни соли 2022 дар зиндони Вакилободи шаҳри Машҳад дар устони Хуросони Разавии Эрон ҷавони 21-солаи ӯзбектабор Абдулатиф Муродиро ба дор кашиданд.

Ғуломалӣ Содиқӣ, раҳбари қувваи қазоияи устони Хуросони Разавӣ гуфт: “Ҳукми эъдоми Абдулатиф Муродӣ дар ҳузури афроди мулкӣ ва мақомот дар маҳбаси Вакилободи Машҳад ба иҷро расонда шуд”.

Содиқӣ гуфт, Абдулатиф Муродӣ, фарзанди Муҳаммадтоҳир дар пайи қатли ду рӯҳонии шиъа дар Ҳарами Имом Ризо, яке аз маконҳои барои шиъаҳо хеле муқаддаси шаҳри Машҳад бо ҷурми “муҳориба” (ҷанг бо Худо) ва эҷоди ваҳшат дар байни мардум маҳкум ба эъдом  аз роҳи ба дор овехтан шуда буд.

Ҳамлаи хунин ба Ҳарами Разавӣ рӯзи 5 апрели соли 2022, дар рӯзҳои аввали моҳи шарифи Рамазон ва ду рӯз пас аз кушта шудани ду рӯҳонии суннӣ дар шаҳри Гунобод, дар 280-километрии ҷануби Машҳад рӯй дод.

Дар видеоҳои нашршуда дида мешавад, ки рӯзи 5 апрел Абдулатиф Муродӣ кордро дар бағал пинҳон карда, бидуни мушкил аз садҳои амниятӣ убур мекунад ва вориди Ҳарами Имом Ризо мешавад. Дар саҳни Ҳарам ӯ се рӯҳонии шиъаро мебинад, ки бо ҳам суҳбат доранд. Муродӣ ба ин се нафар наздик шуда, ногаҳон бо корд ба онҳо ҳамла мекунад. Баъди ин ҳам Муродӣ то чанд дақиқаи дигар корд дар даст намегузорад, ки ӯро дастгир кунанд. Танҳо баъди чанд дақиқаи муҳосира ба яке аз посбонҳои Ҳарам муяссар шуд, ки аз қафо аз ҷавони ӯзбекистонӣ ҳамла оварда, ӯро аз пой биафтонад ва кордро аз дасташ бидарорад.

Бар асари ҷароҳатҳои бардоштааш, Ҳуҷҷатулислом Муҳаммад Аслонӣ дар ҷои ҳодиса ва Ҳуҷҷатулислом Муҳамадсобиқ Дороӣ ду рӯз баъд дар бемористон ҷон бохтанд. Рӯҳонии сеюм, ки ҷавонтар буд, бо кумаки табибон аз марг наҷот ёфт.

Мақомоти Эрон он ҳамларо билофосила ҳамлаи террористӣ унвон карданд ва дар як филми мустанад, ки дар телевизионҳои давлатии Эрон нашр шуд, Абдулатиф Муродӣ пайравӣ ақидаҳои такфирӣ унвон шуд, ки нисбат ба  аҳли ташайюъ ҳисси адоват дошт.

Таҳқиқу баррасии  ин парванда тавассути қувваи қазоия ва додгоҳҳои Эрон бо як суръати ба таври камсобиқа тунд ҷараён гирифт ва алакай рӯзи 7 июни соли 2022, яъне ҳамагӣ баъди ду моҳ, додгоҳ Абдулатиф Муродиро дар “муҳориба”, яъне ҷанг бо Худо муҷрим шинохт ва маҳкум ба қатл кард. Ин ҳукм низ ҳамагӣ 13 рӯз пас аз судураш ба иҷро расонда шуд.

Аксарияти 83 миллион аҳолии Эронро шиъаҳо ташкил медиҳанд. Шумори сунниҳо дар Эрон аз 5 то 10 дарсад рақам зада мешавад. Машҳад бо беш аз 3 миллион аҳолиаш дуюмин шаҳри бузурги Эрон ва яке аз маконҳои умдаи муқаддас барои аҳли ташайюъ ба шумор меравад. Вале дар  Машҳад шумори бузурге аз аҳли суннат, аз ҷумла афғонҳо, туркманҳо, узбекҳо ва халқҳои дигар низ ба сар мебаранд.