Русия парвозҳои "Сомон Эйр"-ро боз маҳдуд кард

Вазорати нақлиёти Русия парвози ҳавопаймоҳои ширкати "Сомон Эйр"- Тоҷикистон аз шаҳрҳои Душанбе ва Хуҷанд ба шаҳрҳои он кишварро маҳдуд кардааст.

Вазорати нақлиёти Русия парвози ҳавопаймоҳои ширкати "Сомон Эйр"-и Тоҷикистон аз Душанбе ва Хуҷанд ба шаҳрҳои он кишварро маҳдуд кардааст. Вазорати нақлиёти Русия рӯзи 2 апрел бо пахши як хабарнома гуфт, ки ин маҳдудият сар аз соати 8:30 дақиқаи(10:30 ба вақти Душанбе) рӯзи душанбеи 3 апрел, оғоз хоҳад шуд.

Ин вазоратхона далели ин иқдомро ба "иҷро нашудани тааҳҳудоти Тоҷикистон дар мавриди парвозҳои ширкати ҳавопаймоии "Ямал"-и Русия аз фурудгоҳи Жуковский ба шаҳрҳои Душанбе ва Хуҷанд" рабт додааст. Ин вазорат ба протоколи гуфтушунидҳо миёни ниҳодҳои ҳавопаймоии Русия ва Тоҷикистон аз 27 январи соли ҷорӣ ишора кардааст, ки дар он ба ширкати "Ямал" иҷозаи чор парвоз аз Жуковский ба Душанбе ва се парвоз ба шаҳри Хуҷанд пешбинӣ шуда буд.

Дар ҳамин ҳол, як манбаъ аз ширкати "Сомон Эйр" субҳи 3 апрел ба Радиои Озодӣ гуфт, ки қарор буд соати 8:00 имрӯз ҳавопаймои ин ширкат ба Маскав парвоз кунад, вале он ба таъхир афтодааст. Вай гуфт "ин парвоз расман лағв нашудааст. Мо мунтазирем, ки иҷозаи парвоз мешавад ё на."

Маҳдудият дар парвозҳои ширкати "Сомон Эйр" ба Русия дар ҳоле пеш омад, ки ҳафтаи гузашта вазорати нақлиёти Русия ҳушдор дод, ки агар Душанбе ба “Ямал” иҷозаи парвоз надиҳад, чораҳои нав хоҳанд андешид.Максим Соколов, вазири нақлиёти Русия, рӯзи 29 март дар сӯҳбат бо хабаргузории РИА Новости гуфт, дар мавриди парвозҳои ширкати “Ямал”-и ин кишвар аз фурудгоҳи Жуковскийи вилояти Маскав ба шаҳрҳои Хуҷанду Душанбе дар авохири моҳи марти соли ҷорӣ мувофиқа ҳосил шуда буд. Ба қавли ӯ, дар ин дидор ҷониби Русия ба парвози ҳавопаймоҳои ширкати “Сомон Эйр”-и Тоҷикистон ба шаҳрҳои Красноярск, Краснодар, Оренбург ва Уфа ризоят додааст.

Моҷарои ҳавоӣ миёни Тоҷикистону Русия баъди он бархост, ки Тоҷикистон дар охири соли гузашта ба парвози ҳавопаймоҳои ширкати “Ямал” аз фурудгоҳи “Жуковский”-и вилояти Маскав ба шаҳрҳои Душанбе ва Хуҷанд иҷозат надод. Ҷониби Тоҷикистон гуфт, дар протоколи танзими парвозҳое, ки рӯзи 7 ноябри соли гузашта дар Маскав имзо шуда буд, парвози ҳавопаймоҳои ширкати “Ямал” ба Тоҷикистон пешбинӣ нашудааст. Аммо Вазорати нақлиёти Русия инро рад карда, рӯзи 23 декабр парвози ҳавопаймоҳои ширкати “Сомон Эйр”-и Тоҷикистонро ба баъзе аз минтақаҳои ин кишвар, ба истиснои Маскаву Санкт-Петербург, қатъ намуд.

Тоҷикистон фақат ду ширкати ҳавопаймоӣ дорад, ки аксаран ба Русия парвоз мекунанд. Аз ҷумла, ширкати “Сомон Эйр” ба 9 шаҳри Русия парвоз ва ширкати давлатии “Тоҷик Эйр” ба 7 шаҳри Русия парвоз анҷом медиҳад. “Уралские авиалинии”, “ЮтЭйр” ва “Сибирские авиалинии” аз ширкатҳои русианд, ки дар бозори мусофиркашонии Тоҷикистон ҳузур доранд. Қимати билети ширкатҳои русӣ дар баробари қимати билети ширкатҳои ҳавопаймоии Тоҷикистон, масалан аз Санкт-Петербург ба Душанбе то 3 ҳазор рубл арзонтар будааст.

назари худро нависед
Қаҳрамонҳои Тоҷикистон