Вохӯрии мақсаднок дар Коллеҷи техникӣ
Ҷавонон бахусус донишҷӯён нерӯи тавоно ва созандаи ҷомеаву давлат ба ҳисоб рафта, пешрату шукуфоӣ ва тараққиёти мамлакат аз ин қишри ҷомеа вобастагии амиқ дорад. Кормандони ВКД ҷиҳати пешгирии ба кирдорҳои хилофи қонун даст задани ин неруи тавоно пайваста чорабиниҳои мақсаднок доир менамоянд.
Бо ин мақсад рӯзи 18 феврали соли 2021 кормандони Раёсати огоҳонӣ ва пешгирии ҳуқуқвайронкунии ноболиғону ҷавонони ВКД дар Коллеҷи техникӣ бо донишҷӯёни ин боргоҳи илм вохӯрии мақсаднок баргузор намуданд.
Дар чорабинӣ ҷавонони фаъол ва намояндагони бахши кор бо ҷавонони ноҳияи Шоҳмансур ва падару модарони муҳассилини коллеҷ иштирок намуданд. Роҳбарияти коллеҷ бо сухани ифтитоҳӣ ба чорабинӣ ҳусни оғоз бахшида, аз заҳмату корнамоиҳои кормандони милитсия ёдовар гардида, иброз дошт, ки робитаву ҳамкории донишҷӯён бо кормандони милитсия ҳарчӣ бештар ба роҳ монда шавад, ҳамон қадар ба пешгирии ҷинояткорӣ ва дигар ҳуқуқвайронкуниҳо мусоидат менамояд.
Дар идомаи чорабинӣ муовини сардори Раёсати огоҳонӣ ва пешгирии ҳуқуқвайронкунии ноболиғону ҷавонони ВКД полковники милитсия Мирзозода Абдулқодир суханронӣ намуд. Зикр гардид, ки ки ҷавонон ояндаи давлату миллат буда, ободӣ, пойдории сулҳу суботи кишвар аз онҳо вобастагии калон дорад. Ҷавонон бояд вақти таҳсили худро танҳо дар омӯхтани илму дониш сарф намуда, ба беҳудагардию шиносоӣ бо ашхоси тасодуфӣ роҳ надиҳанд. Дар мубориза ва муқовимат бо ҷинояту ҷинояткорӣ ҳамеша метавонанд ба мақомоти милитсия такя кунанд.
Дар анҷоми чорабинӣ роҳбарияти коллеҷ барои ташкили чунин як вохӯрии судманд ба кормандони милитсия изҳори сипос ва миннатдорӣ баён намуданд.