Табдили номи Қӯрғонтеппа ба Бохтар ва Сарбанд ба Леваканд

 

Мақомот дар ҳукумати шаҳри Қӯрғонтеппа -- маркази маъмурии вилояти Хатлон тасдиқ карданд, ки номи ин шаҳр ба Бохтар иваз карда мешавад. Шаҳри Қӯрғонтеппа аз соли 1944 то соли 1992 маркази вилояти он замони Қӯрғонтеппа ва аз соли 1993 то ба ҳол, маркази маъмурии вилояти Хатлон мебошад.

Аз ҳукуматҳои шаҳрҳои Қӯрғонтеппа ва Сарбанд рӯзи 29-уми июн ба Радиои Озодӣ тасдиқ карданд, ки бар асоси назарпурсӣ миёни аҳолӣ ва пуштибонии вакилон, ин ду шаҳр ба Бохтар ва Леваканд табдили ном мекунанд. Ба гуфтаи мақомоти ноҳияи Бохтар, номи ин ноҳия ба Кӯшониён иваз карда мешавад. Шаҳри Сарбанд ва ноҳияи Бохтар дар атрофи шаҳри Қӯрғонтеппа ҷойгир мебошанд.

Вакилони маҷлисҳои шаҳрии Қӯрғонтеппа, Сарбанд ва ноҳияи Бохтар рӯзи 28-уми июн дар маҷлисҳои худ аз ин пешниҳод пуштибонӣ кардаанд. Ба гуфтаи хабарнигори Радиои Озодӣ, дар ҳоли ҳозир ҷаласаи ҳукумати вилояти Хатлон идома дорад ва интизор меравад, ки аз ин пешниҳодҳои вакилони маҷлисҳои шаҳру ноҳияҳои Қӯрғонтеппа, Сарбанд ва Бохтар, пуштибонӣ мекунанд.

Ин дар ҳолест, ки панҷ моҳ қабл гурӯҳе аз донишмандон ва шоирону нависандагони тоҷик ба шумули Фарҳод Раҳимӣ, Юсуфшоҳ Яъқубов, Нурмуҳаммад Амиршоҳӣ, Низом Қосим, Абдулҳамиди Самад, Муҳаммад Ғоиб, Барот Абдураҳмонов, Назри Яздон, Қиёмиддин Сатторӣ ва дигарон ба водии Вахш сафар намуда, иваз кардани номҳои ин шаҳру ноҳияҳоро ба ҳукуматҳои маҳаллӣ, пешниҳод карда буданд.

Пешниҳоди тағйири номи шаҳри Қӯрғонтеппа бори нахуст дар солҳои 80-уми асри гузашта аз ҷониби шуморе аз донишмандон дар матбуоти вақт ироа шуда буд. Минбаъд пешниҳодҳо ва назару андеша дар мавриди тағйири номи ин шаҳр борҳо дар матбуот мунташир шуд. Дар ин авохир ҳам ин мавзӯъ дубора мавриди баҳс дар шабакаҳои иҷтимоӣ ва расонаҳо қарор гирифт.

Қӯрғонтеппа маркази маъмурии вилояти Хатлон дар ҷануб-ғарби Тоҷикистон дар соҳили дарёи Вахш ва дар 100-километрии шаҳри Душанбе, ҷойгир аст. Ин шаҳр бо беш аз 100 ҳазор аҳолӣ, севумин шаҳри бузурги Тоҷикистон мебошад. Дар ин шаҳр, ба ҷуз аз тоҷикон, аққалияте аз узбакҳо ва русҳо низ зиндагӣ мекунанд.

назари худро нависед
Қаҳрамонҳои Тоҷикистон