Тағйироти кадрӣ дар ВКД Тоҷикистон: муовини вазир Маҳмадсаид Саидзода аз вазифааш озод карда шуд
Саидзода ба Рашт фиристода шуда, собиқ сардори Воҳиди махсуси ВКД-и ҷумҳурӣ ба ҷойи ӯ таъин шуд.
Маҳҳмадсаид Саидзода то соли 2017 Раёсати БДА-и кишварро роҳбарӣ мекард
Сурат: Акс аз бойгонӣ
Бино ба иттилои хадамоти матбуоти сарвари давлат, бо қарори ҳукумати Тоҷикистон муовини вазири корҳои дохилӣ Саидзода Маҳмадсаид Борон аз вазифааш озод карда шуд. Ӯ аз охири моҳи марти соли 2017 ин мансабро ишғол мекард.
“Саидзода Маҳмадсаид Борон бо сабаби ба кори дигар гузаштан аз вазифаи муовини вазири корҳои дохилии Ҷумҳурии Тоҷикистон озод карда шавад”, - омадааст дар қарори ҳукумат аз 10 сентябр.
Аз ВКД Тоҷикистон ба “Азия-Плюс” хабар доданд, ки генерал-майори милитсия Маҳмадсаид Саидзода сардори Раёсати ВКД дар гурӯҳи ноҳияҳои Рашт таъин шудааст.
Генерал-майори милитсия Бароталӣ Ҳамидзода Партов, ки то ин дам ба ҳайси сардори Воҳиди махсус ВКД-и ҷумҳурӣ кор мекард, ба ҷойи ӯ муовини вазири корҳои дохилӣ таъин гардид.
