ҲАЛОКАТИ 9 ҶАНГИИ ТОҶИКИСТОНӢ ДАР ИМОМ СОҲИБ


Бар асари ҳамлаи ҳавоӣ ба хонаи як фармондеҳи чангиён дар ноҳияи бо Тоҷикистон ҳаммарзи Имом Соҳиб дар вилояти Қундузи Афғонистон 11 ҷангӣ кушта шуданд. 9 нафари онҳо аз Тоҷикистон будаанд.

Фармондеҳи пулиси вилояти Қундуз бо нашри як баёния гуфтааст, ки дар натиҷаи як ҳамлаи ҳавоии нирӯҳои амниятии Афғонистон дар ҳудуди ноҳияи Имом Соҳиб дастикам 11 ҷангӣ, аз ҷумла 9 ҷангии зодаи Тоҷикистони ҳамсоя кушта шуданд. Бино ба ин манбаъ, ҳамлаи ҳавоӣ болои манзили Мӯъмин ном як фармондеҳи бонуфузи маҳаллӣ ва замоне сурат гирифтааст, ки ҷангиён дар ин манзил машғули сохтани бомбаҳои худсохт будаанд.

Гурӯҳҳои чирикии мухолифи ҳукумати Афғонистон, аз ҷумла ҷунбиши Толибон дар ин бора ҳанӯз изҳори назар накардаанд.

Дар ҳамин ҳол, инак рӯзи панҷум аст, ки ҳамлаи Толибон ба маркази ноҳияи Имом Соҳиби вилояти Қундуз идома дорад. Имомуддин Қурайшӣ, вулусволи Имом Соҳиб ба нашрияҳои афғонӣ гуфтааст, ки ҷангиёни толиб алакайй дар тақрибан 500-метрии дафтари ӯ қарор доранд.

Имомуддин Қурайшӣ аз ҳукумати марказӣ хостори ирсоли ҳарчӣ зудтари нирӯҳои иловагӣ барои берун андохтарни Толибон аз ин ноҳияи ҳаммарз бо ноҳияи Панҷи Тоҷикистон шудааст: "Фармондеҳи пулиси вилоят ба Имом Соҳиб омад, вале бо худ нирӯи иловагие наовард. Агар нирӯҳои изофӣ фиристода нашаванд, Имом Соҳиб ба дасти Толибон суқут мекунад.”

Муҳаммадюсуф Аюбӣ, вакили Шӯрои вилоятӣ аз Имом Соҳиб мегӯяд, Толибон алакай бахши бузурге аз қаламрави ин ноҳияро ба даст овардаанд: "Даргириҳо соати тақрибан чори субҳи якшанбе аз қарияи Оқобой оғоз ёфтанд ва даргириҳои сангин то ҳол идома доранд.”

Сафиуллоҳ Амирӣ, узви дигари Шӯрои вилоятӣ гуфт, "Толибон қарияҳои Оқобой, Рӯзи Муборак ва Кӯчи Бахмалро тасарруф кардаанд ва ба маркази ноҳия нуфуз мекунанд.”

Дар дувуним соле, ки аз замони хуруҷи нирӯҳои ҷангии эътилоф аз Афғонистон мегузарад, нуфузи Толибон дар манотиқи дар гузашта ороми шимоли ин кишвар, бахусус дар вилоятҳои бо Тоҷикистон ҳаммарзи Қундуз, Тахор ва Бадахшон торафт меафзояд.

Ба нирӯҳои давлатии Афғонистон тоза рӯзи 11 май муяссар шуда буд, ки ноҳияи Зибокро дар вилояти Бадахшон баъди ду ҳафтаи тасарруфаш аз дасти ҷҶангиёни Толибон пас бигиранд.

Ҳамин тавр, ноҳияи Қалъаи Зол, ки рӯзи 6 май ба дасти Толибон суқут кард, танҳо баъди 10 рӯз ба дасти нирӯҳои давлатӣ баргардонда шуд.

Вилояти Қундуз, ки яке аз минтақаҳои стратегӣ дар шимоли Афғонистон ба шумор меравад, тайи ду соли охир ба мавҷи ҳамлаҳои ҷангиёни мухолифи ҳукумати кунунӣ рӯбарӯ шудааст. Ба ҷангиёни Толибон дар моҳҳои октябри солҳои 2015 ва 2016 ҳатто муяссар шуд, ки ду дафъа маркази ин вилоятро ба дасти худ дароранд. Нирӯҳои давлатӣ танҳо бо кумаки нирӯҳои Амрико ва паймони НАТО тавонистанд Толибонро аз шаҳри Қундуз берун андозанд.

Вале дар дастикам 4 ноҳия аз 7 ноҳияи вилояти Қундуз ҷангиёни Толибон ҳамчунон тасаллут доранд ва ба ҷуз аз марказҳои маъмурии ин навоҳӣ боқӣ қаламравашон таҳти назорати чирикиҳо боқӣ мемонад.

Дар вилояти Кундузи Афғонистон, бино ба оморҳо, ҳудуди 1 миллион нафар ба сар мебаранд, ки 70 дар садашро тоҷикҳо, 15 дар садашро узбакҳо ва 13 дар садашро паштуҳо ташкил медиҳанд. Ин вилоят бо ноҳияҳои Панҷу Дӯстӣ (Қумсангир) ва Шаҳритӯси водии Вахши вилояти Хатлони Тоҷикистон ҳаммарз мебошад. Як қисмати марзи Кундуз бо Тоҷикистон дар рӯбарӯи ҷангалзорҳои мамнӯъгоҳи "Бешаи палангон” ҷойгир шудааст.

назари худро нависед
Қаҳрамонҳои Тоҷикистон