ҲАМЛА БА ШӮЪБАИ МИЛИСА БАРОИ ... ИНТИҚОМГИРӢ

 
                                       Шӯъбаи милисаи ноҳияи Балхӣ. Акс аз сомонаи вазорати дохила


Ду сокини ноҳияи Ҷалолиддини Балхӣ барои қасди ҳамла ва сӯзондани бинои шӯъбаи милисаи ин ноҳия 11 рӯз боз дар боздошт қарор доранд. Ҳадафи Толибҷон Юнусов ва Усмон Бухориев аз ин ҳамла гирифтани интиқом аз кормандони милиса барои ...боздошти мошини сиёҳшишаашон будааст.

Бо гузашти 10 рӯз аз кӯшиши ҳамла ба бинои шӯъбаи корҳои дохилии ноҳияи Ҷалолиддини Балхии вилояти Хатлон дар бораи ин қазияи пурсарусадо ҷузъиёти наве ба даст мерасанд.

Худи қазия аз ин қарор аст, ки шаби 19 май ду сокини маркази ноҳия - Толибҷон Юнусови 20-сола ва Усмон Бухориев, хонандаи 18-солаи мактаби рақами яки ноҳияи Балхӣ - вақте боздошт шуданд, ки бо зарфҳои шишагии пур аз сӯишворӣ ("коктейлҳои Молотов”) мехостанд ба шӯъбаи милисаи ноҳия ҳамла кунанд.

Ин кӯшиши ҳамла дар ҳоле ошкор карда шуд, ки дар моҳҳои охир дар бораи чандин мавриди нақшаи ҳамлаҳои ифротгароёни содиқ ба созмони мамнӯи ДОИШ ("Давлати исломӣ”) дар вилояти Хатлон гузориш шуда буд ва табъан боздошти ин ду ҷавон низ ҳадсу гумонҳоро ба сӯи ДОИШ бурд.

Аммо маълум мешавад, ки дар пушти ин кӯшиши ҳамла ба бинои милиса талоши интиқомҷӯии ин ду ҷавон дар пайи боздошти мошинашон аз сӯи кормандони БДА – Бозрасии давлатии автомобилӣ ё ГАИ истода будааст.

Нашрияи "СССР” аз қавли манбааш дар мақомоти интизомии ноҳияи Ҷалолиддини Балхӣ навишт, ки Толибҷон Юнусов - писари корманди собиқи милисаи ноҳия мошини падарашро гирифта, ҳамроҳи дӯсташ Усмон Бухориев ба тӯйи як дӯсти дигарашон раҳсипор мешаванд. Дар ними роҳ Усмон пешниҳод мекунад, ки биё, шишаҳои мошинро сиёҳ кунем.

Толибҷон розӣ мешавад ва, тавре "СССР менависад, "аз бозори марказӣ ба маблағи 14 сомонӣ «плёнка» харидорӣ намуда, худсарона мошинро сиёҳ мекунанд.

Чунин мошини сиёҳшишаи бе иҷозатнома, албатта, як "хӯрок”-и тайёр барои кормандони БДА аст, чунки ҷарима барои бидуни иҷозатнома сиёҳ кардани шишаҳои мошин дар Тоҷикистон хеле баланд аст.

Хулоса, дар роҳ ба сӯи тӯйхона корманди БДА мошини Толибҷонро манъ мекунад ва байни онҳо муноқиша бармехезад. Толибҷон талош мекунад, ки бо истифода аз обрӯ ва номи падараш, ки низ корманди милиса буд, худрову мошинро аз дасти кормандони БДА халос кунад, вале гапи байни онҳо дар ниҳоят мегурезад ва "мошини онҳоро ба ШВКД-и ноҳия бурда, дар он ҷо онҳоро барои надоштани ҳуҷҷат 5 ҳазор сомонӣ ҷарима кардаанд.

Шом вақте падари Толибҷон аз вай дар бораи куҷо будани мошин мепурсад, Толибҷон мегӯяд, ки "шумодар ноҳия қадр надоштаед, мошинатонро дар ШВКД-и ноҳия махкам кардаанд. Падари ӯ дар навбати худ, бо ғазаб ба чанд корманди пулис занг зада, ҷанҷол мекунад, ки наход ман беш аз 20 сол дар ин мақомот кор карда бошаму шумо мошини маро маҳкам кунед? Кормандони пулис ӯро ором карда мегуянд, ки мошини шумо иҷозатномаи сиёҳшиша надошт. Собиқ корманди пулис мегуяд, ки охир мошини ман сиёҳ кардагӣ нест... "

Вақте маълум шуд, ки писараш шишаҳои мошинро худсарона сиёҳ кардааст, падари Толибҷон аз ҳамкорони собиқаш узр хоста, писарашро дар пеши онҳо чанд шаппотӣ мезанад.

"СССР” меафзояд: "Бегоҳ писари собиқ милиса дар хонаи дӯстонаш нишаста, маслиҳат мекунад, ки бояд худи мошин ва ШВКД-ро алов занад. Бо маслиҳати пешакӣ бо Усмон Бухориев 2 зарф «бутилка»-ро пур аз сӯзишворӣ намуда, назди бинои пулис омада, мепартоянд. Ин ҳолатро камераи назоратӣ сабт ва онҳоро дастгир мекунанд. "
Ба зидди Усмон Бухориев бар асоси ду модда ва ба зидди Толибҷон Юнусов бар асоси чор моддаи Кодекси ҷиноятии Тоҷикистон парвандаи ҷиноятӣ кушодаанд. Иттиҳоми асосии зидди онҳо кӯшиши сӯзондани бинои шӯъбаи милиса аст.

назари худро нависед
Қаҳрамонҳои Тоҷикистон