Рейди кормандони милитсия дар мактаби миёна

Дар доираи нақшаи муштараки Вазорати корҳои дохилӣ ва Вазорати маориф ва илми Ҷумҳурии Тоҷикистон, инчунин бо мақсади пешгирӣ намудани амалу рафторҳои ношоиста миёни ноболиғону ҷавонон кормандони Хадамоти пешгирии ҳуқуқвайронкунӣ дар байни ноболиғон ва ҷавонони Вазорати корҳои дохилӣ пайваста чораандешӣ мекунанд. 

Аз ҷумла, чунин як чорабинии мақсаднок дар муассисаи таҳсилоти миёнаи умумии рақами 59-и ноҳияи Синои шаҳри Душанбе гузаронида шуд. Боиси тазаккур аст, ки ҳангоми баргузории рейди кормандони милитсия ягон ҳолати вайрон намудани талаботи таҳсил дар ин мактаби миёна ба қайд гирифта нашуд. Рафтуомади хонандагон ба мактаб ва риоя намудани соати дарсӣ аз тарафи онҳо низ дар сатҳи зарурӣ иҷро карда мешуд.
Кормандони милитсия ба маъмурияти ин муассисаи таҳсилоти миёнаи умумӣ барои дар сатҳи лозимӣ ба роҳ мондани кор изҳори миннатдорӣ намуданд. Хонандагони ин мактаб низ барои риояву иҷро намудани талаботи таҳсил дар муассисаҳои таълимӣ мавриди ситоиш қарор гирифта, кормандони Хадамоти пешгирии ҳуқуқвайронкунӣ дар байни ноболиғон ва ҷавонони ВКД аз наврасону ҷавонони дар ин мактаб таҳсилкарда даъват намуданд, ки ба чунин талошу кӯшиш идома дода, дар оянда барои худ ва ҷомеа афроди фоидаовар шаванд.
Дар навбати худ хонандагони муассисаи таҳсилоти миёнаи умумии рақами 59-и ноҳияи Сино қавл доданд, ки минбаъд низ дар таҳсил фаъолнокӣ зоҳир намуда, дар тамоми корҳои ҷамъиятии мактаб ва шаҳр иштирок менамоянд.
Ҳамчунин, ба ин монанд, дар 10 муассисаи таҳсилоти миёнаи умумии ноҳияи Шоҳмансури шаҳри Душанбе бо иштироки кормандони Хадамоти пешгирии ҳуқуқвайронкунӣ дар байни ноболиғон ва ҷавонони ВКД ва ҷавонони фаъоли гурӯҳи «Авангард» низ вохӯриҳои судманд ташкил ва гузаронида шуданд.

Зимни ин ҷамъомадҳо кормандони милитсия оид ба вазъи ҳуқуқвайронкуниву ҷинояткорӣ дар байни ноболиғону ҷавонон маълумот дода, масъулияти волидонро аз нигоҳи қонунгузории ҷумҳурӣ шарҳу тавзеҳ доданд. Хусусан, дар ин гуна суҳбату мулоқотҳо масоили марбут ба иҷроиши талаботи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» мавриди баррасӣ қарор дода шуд. Аз хонандагону омӯзгорон ва волидон даъват карда шуд, ки баҳри дар амал татбиқ намудани талаботи ин қонуни ҳаётан муҳим ва дигар санадҳои меъёриву ҳуқуқие, ки фаъолияти мактабу дигар муассисаҳои тобеи Вазорати маориф ва илмро ба танзим медароранд, кӯшиш ба харҷ диҳанд.
Абдулло Шоев, нозири калони гурӯҳи матбуотии ХПҲНҶ ВКД ҶТ, капитани милитсия 

 
назари худро нависед
Қаҳрамонҳои Тоҷикистон