Саидҷаъфар Усмонзода: маблағи хидмати пулакӣ ҳангуфт аст, зӯри ҳама намерасад
Хатмкунандагони макотиби олӣ аллакай ба вакилон бо ин масъала муроҷиат мекунанд.
Саидҷаъфар УсмонзодаСурат: sng.today
Раиси Ҳизби демократи Тоҷикистон (ҲДТ), вакили палатаи поёнии парлумони Тоҷикистон дар мусоҳиба ба “Азия-Плюс” изҳор намуд, ки то имрӯз чанде аз донишҷӯёни хатмкунандаи макотиби олӣ бо ин масъала ба ӯ муроҷиат кардаанд.
Ба онҳо интихоб лозим - як сол хизмати ҳарбиро адо кардан ё бо пардохти пул як моҳ гузаштан аз хизмати ҳарбии эҳтиётӣ. Айни замон 25 ҳазор сомонӣ маблағи пардохт барои хизмати эҳтиётӣ баррасӣ мешавад, лекин ин ҳоло ҳадди ниҳоӣ набуда, то охири март ҳукумат дар ин бора ба хулосаи ниҳоӣ мерасад.
“Дар мактабҳои олӣ ба онҳо аллакай эълон кардаанд, ки ин маблағ аз 25 то 28 ҳазор сомониро ташкил хоҳад дод, - гуфт вакил. - Хатмкунандагон ҳайронанд, ки аз куҷо ин қадар пул меёбанд ва кӣ ин маблағи имрӯз барои Тоҷикистон ҳангуфтро фикр карда баровардааст”.
“Ҳамасола мактабҳои Тоҷикистонро ҳудуди 65 ҳазор наврас хатм карда, талаботи артиш бошад 15 ҳазор наваскаронро ташкил медиҳад ва ин маънои онро дорад, ки дар як сол қариб 50 ҳазор кас бояд аз хизмати ҳарбии пулакӣ гузаранд, - мегӯяд ӯ. - Ман мутаминам, ки аз ин 50 ҳазор ҷавон ҳамагӣ ҳудуди 5-6% аз ҳисоби волидони сарватманди худ метавонанд 25 ҳазор пули хизматро супорида, боқимонда ба ин кор имкон надоранд, ки метавонад миёни аҳолӣ норозигӣ ба вуҷуд орад”.
Ба ақидаи ӯ, маблағи пардохт барои хизмати ҳарбӣ набояд аз 2-4 ҳазор сомонӣ зиёд бошад, “ба мисле, ки дар Ӯзбекистон муқаррар шудааст”.
“Президенти Тоҷикистон ҳамеша мансабдорони давлатиро даъват мекунад, ки дар бораи осон кардани зиндагии мардум фикр кунанд, лекин қарорҳои бемулоҳиза, аз ҷумла дар бораи хизмати пулакӣ метавонад боиси норозигиҳо шавад ва ман аз мансабдорони Вазорати мудофиа ва Хадамоти зиддиинҳисорӣ даъват мекунам, ки дар қабули қарор оид ба ин масъала ба шитобкорӣ роҳ надиҳанд”, - илова кард Усмонзода.Ёдрас мекунем, ки палатаи поёнии парлумони Тоҷикистон рӯзи 20 январ ба таҳрири нави қонун “Дар бораи уҳдадории ҳарбӣ ва хизмати ҳарбӣ” мувофиқат кард.
Мувофиқи тағйирот, дар ҷумҳурӣ намуди нави хидмат барои ҳайати захираҳои даъвати сафарбарӣ ҷорӣ мешавад. Муҳлати он як моҳ ва бо пардохти маблағи муайян пешбинӣ гардида, ба хатмкардагони макотиби олӣ низ акнун лозим меояд, ки дар артиш як сол хизмат кунанд. Хатмкунандагоне, ки як сол хизмат кардан намехоҳанд, низ бояд бо пардохти маблағ як моҳ хизмат кунанд.
Зимни шарҳи ин тағйирот ба вакилон вазири мудофиаи ҷумҳурӣ Шералӣ Мирзо қайд карда буд, ки “ҳамасола ҳамагӣ ҳудуди 10% ҷавонон ба хизмат дар сафи Қувваҳои мусаллаҳ даъват шуда, боқимонда 90% аз хизмат канор мемонанд”.
“Барои ҳайати захираҳои даъвати сафарбарӣ намуди нави хизмат ташкил мешавад: дар муддати як моҳ бо пардохти маблағи муайян онҳо маҳорати гузаштан аз хизмати ҳарбиро меомӯзанд. Бо анҷоми ин курсҳо ба онҳо шаҳодатномаи ҳарбӣ дода мешавад”, - гуфта буд вазири мудофиаи Тоҷикистон.
