Рӯзи паёми Эмомалӣ Раҳмон маълум шуд: 26 январ
Маъмулан самтҳои асосии сиёсати дохилӣ ва хориҷии кишвар муайян карда мешаванд.
Эмомалӣ Раҳмон, акс аз бойгонӣ
Сурат: хадамоти матбуоти сарвари давлат
Президенти Тоҷикистон Эмомалӣ Раҳмон паёми ҳамасолаи худро ба парлумон рӯзи 26 январ ироа мекунад, хабар дод ба “Азия-Плюс” як манбаъ аз ҳукумати ҷумҳурӣ.
Раисҷумҳури Тоҷикистон замони ироаи паёми худ, маъмулан самтҳои асосии сиёсати дохилу хориҷ, инчунин рушди иҷтимоӣ-иқтисодии кишварро дар соли ҷорӣ мушаххас мекунад.
Ҳамасола ба ҷуз вакилону аъзои Маҷлиси Олӣ, ҳамчунин раҳбарони вилояту шаҳру ноҳияҳо, вазорату ниҳодҳои кишвар, ходимони илму фарҳанг, намояндаҳои дипломатии муқими кишвар ва созмонҳои байналмилалӣ низ даъват мешаванд.
Кормандони ҳамаи ниҳодҳои давлатӣ, донишҷӯёни донишгоҳҳо ва хонандаҳои синфҳои болоии мактабҳо ҳамасола паёми Эмомалӣ Раҳмонро дар толорҳои муассисаҳояшон гӯш мекунанд.
Ҳамаи шабакаҳои давлатии телевизиону радиои кишвар маросими ироаи паёмро ба таври зинда нашр мекунанд.
Бо қарори раиси палатаи болоии парлумони Тоҷикистон Рустами Эмомалӣ як рӯз пеш то ироаи паём - 25 январ дар Душанбе иҷлосияи шашуми Маҷлиси миллии Маҷлиси Олии ҷумҳурӣ баргузор мешавад.
Аз соли 2015 президент то охири моҳи декабр паёми худро ба парлумон ироа мекард, лекин имсол он охири моҳи январ сурат мегирад.
