Ҳукумати Тоҷикистон лоиҳаи тағйироту иловаҳоро ба Кодекси кишвар “Дар бораи ҳуқуқвайронкунии маъмурӣ”, ки дар онҳо барои воридоти маҳсулоти хӯрокворӣ ва доурувории пастсифату муҳлати истифодааш гузашта муҷозот пешбинӣ шудааст, ҷиҳати баррасӣ ба палатаи поёнии парлумон фиристод.

Мувофиқи лоиҳаи пешниҳодшуда, барои воридоти маҳсулот ва доувории тиббии пастсифат ба кишвар шахсони мансабдор ба маблағи аз 7,5 то 10 ҳазор сомонӣ ҷарима мешаванд.

Ҳаҷми ҷарима барои содир шудани чунин амал аз ҷониби шахсони ҳуқуқӣ аз 25 ҳазор то 35 ҳазор сомониро ташкил медиҳад, хабар доданд ба “Азия-Плюс” аз Маҷлиси намояндагони Маҷлиси олии ҷумҳурӣ.

Ғайр аз ин, агар чунин амал такроран содир шавад, пас ҳаҷми ҷарима барои шахсони мансабдор – аз 25 то 50 ҳазор сомонӣ ва барои шахсони ҳуқуқӣ – аз 35 ҳазор то 50 ҳазор сомонӣ муқаррар гардидааст.

Дар ҳарду ҳолат маҳсулоти пастсифат ё муҳлати истифодааш гузаштаи ошкоршуда мусодира ва нобуд карда мешавад.

Айни замон барои воридоти маҳсулот ва дорувории пастсифат танҳо мусодираи он сурат гирифта, ҷазо муқаррар нашудааст.

Қобили зикр аст, ки охири моҳи ноябри соли гузашта президенти Тоҷикистон Эмомалӣ Раҳмон дар маҷлиси ҳукумат аз сатҳи сифати маҳсулоти хӯроквории воридотӣ, аз ҷумла гӯшти мурғ нигаронӣ изҳор намуд.

«Кӣ ба марги кӯдаки аз ҳасиби истеҳсоли маҳаллӣ заҳролудшуда ҷавоб мегӯяд? Мувофиқи натиҷаи санҷишҳо, сабабаш он аст, ки 90 фоизи маҳсулоти гӯштӣ ба қоидаҳои санитарӣ ва меъёрҳои қабулшуда ҷавобгӯ нестанд», - изҳор дошт Президент зимни ироаи Паёми ҳамасола ба парлумони кишвар.

Он замон бо ин сабаб бинобар беэътиноӣ зоҳир кардан ба вазифаҳои ишғолкарда ва беназоратӣ нисбат ба воридоти маҳсулоти пастсифати хӯрока, директори Агентии стандартизатсия, метрология, сертификатсия ва нозироти савдои назди ҳукумати ҶТ  Ибодулло Қурбониён, Хадамоти назорати байтории Вазорати кишоварзии ҶТ Шералӣ Вазиров ва Хадамоти назорати давлатии санитариву эпидемиологии Вазорати тандурустӣ ва ҳифзи иҷтимоии аҳолии ҶТ Холмуҳаммад Каримзода аз вазифа озод карда шуданд.