Раиси бозори “Деҳқон”: Намегузорем дар Рамазон қимматфурӯшӣ кунанд


 

Зиёвиддин Наҷмиддинов, раиси бозори “Деҳқон” мегӯяд, имсол дар моҳи Рамазон иҷозат нахоҳанд дод, ки тоҷирон нархи маҳсулотро тариқи сунъӣ боло баранд.

Наҷмиддинов имрӯз, 25-уми май дар ҳошияи боздиди гуруҳи хабарнигорон аз бозори “Деҳқон”, дар суҳбат бо “Озодагон” гуфт, барои ҷилавгирӣ аз болоравии нархҳо дар моҳи Рамазон феълан бо беш аз 200 хоҷагии деҳқонӣ аз Хатлон, Суғд ва навоҳии тобеи марказ дар мавриди таъмини маҳсулот шартнома бастаанд.

Ӯ гуфт барои қимат нашудани нархҳо, аз фонди бозор, ки феълан 60 ҳазор сомонӣ аст, истифода хоҳанд кард. Наҷмиддинов илова намуд, ки нархномаи 12 намуди маҳсулоти ниёзи аввалро пешниҳод кардаанд, ки дар қиёс бо нархҳои моҳҳои пешӣ то 20-25 фоиз арзонтар мебошад. Ба гуфтаи раиси бозори "Деҳқон" вобаста ба сифат орди навъи 1 аз 150-170 сомонӣ, биринҷ аз 5 то 12 сомонӣ, картошка аз 2 то 4 сомон, пиёз аз 1 то 2 сомонӣ, сабзӣ аз 2 то 2,5 сомонӣ, гӯшти гов аз 30 то 36 сомонӣ, гӯшти гӯсфанд аз 35 то 36 сомонӣ, помидор аз 2,5 то 6 сомонӣ, бодиринг аз 1,5 то 2,5 сомонӣ фурӯхта хоҳад шуд.

Ӯ таъкид намуд, ки давоми моҳи шарифи Рамазон тоҷиронро аз пардохти ҳаққи “чек” озод хоҳанд кард. Тоҷирони бозори мазкур андозро асоси гаронии нархҳо гуфта, афзуданд, ки агар ақаллан дар моҳи Рамазон андозро 10-20 фоиз сабук кунанд, имкон доранд, нархро боз поинтар баранд.

Абдумаҷид Ҳакимзода, сухангӯи шаҳрдории Душанбе, ки хабарнигоронро зимни ин боздид ҳамроҳӣ мекард, изҳор дошт, ки барои назорати нархҳо ва иҷрои қарори раиси шаҳри Душанбе дар бораи ғанигардонии бозори истеъмолии пойтахт комиссияи махсус ташкил шудааст.

назари худро нависед
Қаҳрамонҳои Тоҷикистон