Ошкор гардидани ҷиноятҳои дуздӣ
Ба ШВКД дар шаҳри Бохтар бо ариза марди 48-солаи сокини ҷамоати деҳоти Халеварди ноҳияи Ҷ.Балхӣ муроҷиат намудааст, ки аз моҳи ноябри соли 2020, то инҷониб шахсони номаълум бо роҳи пинҳонӣ ба устохонаи таъмири автомашинааш, воқеъ дар ноҳия Ҷ.Балхӣ даромада, аз дохили сандуқи оҳанин (сейф) 4 ҳазору 50-сомонӣ ва 5-адад аккумулятори тамғаи “Доминатор”-ро дуздида, аз ҷойи ҳодиса ғайб задаанд. Зарари расонидашуда 6 ҳазору 950-сомониро ташкил медиҳад.Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 38-солаи сокини ҷамоати деҳоти Зархези ноҳияи Ҷ.Балхӣ бо гумони содир намудани ҷинояти дуздӣ дастгир карда шуд.
Инчунин дар натиҷаи гузаронидани чорабиниҳои оперативӣ-ҷустуҷӯӣ аз ҷониби кормандони милитсия муайян карда шуд, ки санаи 17-уми декабри соли 2020, тахминан соати 13:00, ҷавонзани 21-солаи сокини ҷамоати деҳоти Баҳори шаҳри Ваҳдат, бо роҳи пинҳонӣ ба хонаи истиқоматии марди 36-солаи сокини ҳамонҷо даромада, аз дохили сандуқи оҳанин ҳуҷҷатҳои хона ва 4 ҳазору 900-сомониро дуздида, аз ҷойи ҳодиса ғайб задааст.
Аз рӯи ин ҳодисаҳо тафтишот идома дорад.