Мексика барои сохтани девори сарҳадаш маблағ ҷудо намекунад

Мексика барои бунёди девор дар сарҳад бо Иёлоти Муттаҳидаи Амрико маблағ пардохт нахоҳад кард.

Бо чунин изҳорот президенти Мексика - Энрике Пеня Нието баромад кард. Президенти тозаинтихоби Иёлоти Муттаҳидаи Амрико Доналд Трамп борҳо таъкид намуда буд, ки Мексикаро водор месозад, то қисме аз харҷи лоиҳаро, ки 10-12 миллиард долларро ташкил медиҳад, пардохт намояд. Пеня Нието зикр кард, ки кишвараш бо маъмурияти нави Иёлоти Муттаҳидаи Амрико дар як қатор масъалаҳо ихтилофи назар дорад. Президенти Мексика илова кард, ки Вашингтон бояд масъулияти интиқоли ғайриқонунии силоҳ ва пулро ба кишвараш, ки ба дасти гурӯҳҳои нашъаҷаллоб меафтад, ба уҳда гирад. Доналд Трамп ваъда дода буд, ки пас аз оғози фаъолият дар мансаби президентӣ дар марз бо Мексика ба бунёди девор бо баландии 15 метро оғоз мекунад. Ин тадбирро Трамп ба хотири пешгирӣ аз вуруди барзиёди муҳоҷирон арзёбӣ намудааст. Президенти тозаинтихоби Иёлоти Муттаҳидаи Амрико Доналд Трамп ҳамчунин мақсад дорад, ки созишномаи тиҷоратиро бо Мексика дубора баррасӣ намояд. 

назари худро нависед
Қаҳрамонҳои Тоҷикистон