НИГОҲИ ДИГАР: АДИБАИ АЗИЗ ИЗДИВОҶИ СУРАЙЁ ВА ПӮЛОДРО ҚАШАНГТАРИН НИКОҲИ СОЛ НОМИД
Шоираи тоҷик Адибаи Азиз издивоҷи овозхони шинохта Сурайё Қосимро бо Пӯлод Шаропов, як марди аз худаш 18 сол хурдро "қашангтарин никоҳи сол” номид. Адиба навишт: "Чаро ба пирамардҳо издивоҷ бо духтари ҷавон айб неву ба хонумҳо айби КАППА КАЛОН?!” Адибаи Азиз бархӯрдҳои манфӣ ба ин издивоҷро аз стереотипҳои ғалати "ҷомеаи ҳасуди карахти мардсолору занозори мо” номида, Сурайё Қосимоваро барои намоиши чунин як ҷуръат муборакбод гуфта, навиштааст: "Шаҳ ба пои арӯс пир шавад, илоҳо.”Хабари издивоҷи Сурайё Қосимоваи 63-сола бо Пӯлод Шаропови 45-сола шӯри зиёдеро дар Интернет барангехт ва вокунишҳои гуногунро ба бор овард.
ادیبه عزیز
Қашангтарин никоҳи сол...
Ҳама гулҳо ба тақдимат Сурайё
Чаро ба пирамардҳо издивоҷ бо духтари ҷавон айб неву ба хонумҳо айби КАППА КАЛОН?!
Ба маълумоти шумо мерасонам, ки ЗАН ПИРШАВӢ НАДОРАД! ОН МУШКИЛҲОИ ҶИНСИЕ, КИ БО ГУЗАШТИ СИН МАРД ДОРАД, ДАР ВУҶУДИ ЗАН АСЛАН ТАБАДУЛЛОТ ВА ЗАЪИФӢ НЕСТ.
Чӣ қадаре занҳо синашон боло меравад, ҳамон қадар ишқ ва иртиботро бо мард бештар эҳсос мекунанд.
Муборакии шаби никоҳи Сурайёхонум ҳазору сад ҳазор бор!
Шаҳ ба пои арӯс пир шавад, илоҳо.
Он рӯз дур нест, ки ҷавонҳо монанди Пӯлод ошкоро ақд мебанданд. Ба зудиҳо дар ҷомеаи ҳасуди карахти мардсолору занозори мо ба ҳам омадани ду шахсе, ки ҳамдигарро ошиқона мехоҳанд, ба ҳукми анъана медарояд.
ШАВҲАРИ НАВИ СУРАЙЁ: ПӮЛОД ШАРОПОВ КИСТ?
Муаллиф: Мӯсо Бобоoҳоҷиев, Asia-Plus
Ӯ мегӯяд, издивоҷаш бо Сурайё Қосимова ҳосили ишқи пок аст
Ба "Азия-Плюс” муяссар шуд, шахсияти шавҳари нави ҳунарманди мардумии Тоҷикистон Сурайё Қосимоваро, ки порае аз видеои тӯйи онҳо дар шабакаҳои иҷтимоӣ ҳагомаҳо ба вуҷуд овардааст, муайян кунад.
Шавҳари нави Сурйё дар суҳбат бо "Азия-Плюс” гуфт, ки Пӯлод Шаропов ному насаб дорад, сокини шаҳри Душанбе, варзишкор ва ба соҳибкорӣ машғул аст. Пӯлод Шаропов гуфт, ки синну солаш на 32 тавре дар расонаҳо ва шабакаҳои иҷтимоӣ навиштаанд, балки 45-сола аст.
Шавҳари нави Сурайё мегӯяд, ки издивоҷи ӯ бо ҳунарманди шинохта на як ҳангома ё ҳавохоҳӣ, балки бар асари ишқи пок ва алоқае шадиде, ки ба ҳунарманд дошт, сурат мегирад. Ӯ гуфт "ҳамаи онҳое, ки дар шабакаҳои иҷтимоӣ ин кори шахсии маро ба баҳс кашидаанд, бигзор мисли ман хушбахт бошанд".
Пӯлод Шаропов мегӯяд, ки издивоҷаш бо Сурайё Қосимова издивоҷи дуюм аст ва аз ҳамсари нахустинашсе фарзанд дорад.Пӯлод Шаропов ба суоли ин ки ҳоло ба бону Сурайё дар Душанбе умр ба сар мебарад ё Кӯлоб посух надод ва гуфт, ки бигзор ин махфӣ бошад. Ҳамчунин ӯ гуфт, ки замон ва макони тӯйяш ҳам махфӣ аст ва намехоҳад дар ин бора бо расонаҳо суҳбат кунад.
Рӯзи 24-уми сентябр пораи видеоии аз тӯйи Сурайё Қосимова вориди шабакаҳои иҷтимоӣ ва расонаҳо шуд, ки дар шарҳи он гуфта мешуд, шавҳари нави Сурайё як ҷавони 32-сола аст.
Сурайё Қосимова Ҳунарманди халқии Тоҷикистон аст, ки 22 апрели имсол ба синни 63-солагӣ расид. Ӯ соли 1957 дар шаҳри Кӯлоби вилояти Хатлон таваллуд шудааст. Ин ҳунарманд қабл аз ин издивоҷи пурсару садояш ду бори дигар низ издивоҷ кардааст, ки ҳосили издивоҷи аввал духтари ҳунармандаш Шабнаби Сурайё, яке дигар аз овозхонҳои маъруфи Тоҷикистон мебошад.
Аз издивоҷи дувумаш бо Хуршед Рабиев, сарҳанги пулис се фарзанд дорад, ки яке аз онҳо Фарзонаи Хуршед ҳам овозхон аст. Ин бону соли 1970 мактаби миёнаро хатм намуда, то ҳол дар Театри драмаи мусиқии шаҳри Кӯлоб ба номи Сайдалӣ Вализода кору фаъолият мекунад.
