ФОТИҲАХОНИИ ПРЕЗИДЕНТИ УЗБЕКИСТОН ДАР РӮЗИ ИД (ВИДЕО)

  • 28.06.2017, 06:17,
  • Дин
  • Хонанда: 1 045
  • 0

Раисиҷумҳури Узбекистон Шавкат Мирзиёев дар рӯзи иди Фитр ба хонаи президенти қаблӣ Ислом Каримов рафта, барои арвоҳи ӯ дуову фотиҳа хонд. Мирзиёев дар рӯзи ид ҳамчунин аз як беморхона ва як интернати маризони рӯҳӣ аёдат кардааст.

Телевизиони давлатии Узбекистон навори дар рӯзи иди Фитр барои дуову фотиҳахонӣ ба манзили президенти қаблӣ Ислом Каримов рафтани раисиҷумҳури кунунӣ Шавкат Мирзиёевро нашр кард. Дар навор дида мешавад, ки Шавкат Мирзиёев ҳамроҳи муфтии Узбекистон Усмон Олимов вориди манзили Ислом Каримов мешаванд. Сипас як рӯҳонӣ оятеро аз "Қуръон” тиловат мекунад ва баъди фотиҳа ҳама, аз ҷумла Шавкат Мирзиёев "Омин” гуфта, даст ба рӯ мекашанд.

Дар рӯзи ид ба хонаҳое, ки ба истилоҳ мурдаи нав доранд, рафтану дар ҳаққи гузаштагон дуо кардан аз суннатҳои халқҳои мусалмон, аз ҷумла сокинони Осиёи Марказист. Вале то кунун наворҳои фотиҳахонӣ рафтани раҳбарони аввали кишварҳои ин минтақа ками дар кам нашр шудааст.


Шавкат Мирзиёев, ки дар тирамоҳи гузашта дар пайи даргузашти Ислом Каримов ба мақоми раҳбари аввали Узбекистон расид, дар ин моҳҳои аввали раҳбариаш талош дорад, аз худ намунаи як раҳбари ба халқ наздик ва ғайрипротоколиро ба намоиш гузорад.

Мирзиёев ҳамин тавр дар рӯзи ид аз беморхонаи маризони рӯҳӣ ва аз интернати "Муриват”, ки дар шаҳри Тошканд низ барои маризони рӯҳӣ таъсис ёфтааст, аёдат кард.

Хабарнигорони муқими Узбекистон мегӯянд, Шавкат Мирзиёев дар замони сарвазириаш низ чунин ташаббусҳои барои мансабдорони баландпояи Осиёи Марказӣ ғайриоддӣ нишон медод.

Мирзиёев аз ҷумла гоҳо либоси оддӣ пӯшида, ҳамчун корафтода ба ягон бемористон ё мактаб ё боғчаи кӯдакон мерафт.

Ду сол пеш вақте Мирзиёев худро мариз гирифта, ба як бемористони Тошканд рафт ва ӯро ду соат дар навбат нигоҳ доштанду дар охир ба сараш дод ҳам заданд, баъди баргаштан ба ҷои кор сартабиби он бемористонро бо мудирони тамоми шӯъбаҳояш аз кор барканор карда буд.

Бори дигар Мирзиёев либоси назарногире дар тан писарчаи як ҳамсояашро ҳамроҳ гирифта, ба як боғча рафт, ки ӯро номнавис кунад. Дар онҷо ба ӯ гуфтанд, ки мунтазир бишинад ва вақте "апа”, яъне мудири боғча омад, бо ӯ гап занад. Дар ин ҳангом кормандони боғчаи кӯдакон гӯштбирён мепухтанд. Мирзиёев аз онҳо пурсид, ки ин ғизо барои кӯдакон аст? Ба ӯ гуфтанд, ки "кӯдакон хок хӯранд, ин ҳама барои "апа” аст.” Баъди бозгашташ ба ҷои кор Мирзиёев вазири маориф ва он мудири боғчаро ба ҳузур хонда, ҳамонҷо ҷавоби "апа”-ро дода буд.

Вале як дафъа вақте ӯ ҳамин тавр, бо либоси оддӣ ба бозор сар зад, ки аз вазъи воқеии нарху наво хабар ёбад, нонфурӯше ӯро шинохт ва вақте Мирзиёев аз вай пурсид, ки "нонат чанд пул?”, ин нонфурӯш посухаш дод, ки "барои шумо бепул. Ман медонам, ки шумо Мирзиёев ҳастед ва мисли халифа Ҳорун-ар-Рашид нонамоён байни мардум мегардед, ки аҳволи воқеиро бифаҳмед.”

Моҳи май Шавкат Мирзиёев алакай ҳамчун президент зимни боздидаш аз ноҳияи Яшнободи Тошканд ба ҷои бемористоне, ки боздидаш дар барномаи сафари ӯ буд, талаб кард, то ба нахустин бемористони сари роҳаш, ки барои пешвози президент комилан ноомода буд, раванд.

Гулу гулдаставу шиору рақсу суруд ва тармими зоҳирии бемористони марказии Яшнобод, ки махсус барои сафари президент омодааш карда буданд, ба кор наомад. Ба ҷои ин баъди дидани вазъи воқеии бемористони рақами 32 ба сари мансабдороне, ки Мирзиёевро ҳамроҳӣ мекарданд, борони танқид рехт, ки ба ҷои кор ва ислоҳи вазъ мехоҳанд ба чашми ӯ хок бипошанд.

назари худро нависед
Қаҳрамонҳои Тоҷикистон