ШАВКАТ МИРЗИЁЕВ: ДИНДОРОНРО АЗ РӮЙХАТИ СИЁҲ БАРОРЕД!

  • 22.06.2017, 16:44,
  • Дин
  • хонанда 758
  • 0

Раисиҷумҳури Узбекистон Шавкат Мирзиёев дар мулоқот бо рӯҳониён хостори бозбинии парвандаҳои муллоҳое шуд, ки ба рӯйхати сиёҳ афтодаанд. Барои бозбинии ин парвандаҳо дар ҳар ноҳияи Узбекистон гурӯҳи махсус ташкил карда мешавад.

Мулоқоти рӯзи 15 июни раисиҷумҳури Узбекистон Шавкат Мирзиёев бо рӯҳониён 7 соат – аз соати ҳафти субҳ то 14 давом кардааст. Ин нишаст, ки таҳти унвони "Таъмини суботи муҳити иҷтимоиву мазҳаӣ, ҳифзи тозагии дини мубини мо” доир шуд, ба шакли видеоселектор гузашт ва беш аз 1200 нафар суханронии президентро мустақиман дар толор ва то 10 ҳазор нафари дигар дар марказҳои вилоятҳову шаҳрҳои бузург аз тариқи видеоселектор тамошо кардаанд.

Суханронии худи Шавкат Мирзиёев дар ин ҷаласа якҷо бо саволу ҷавобҳояш қариб 5 соат тӯл кашидааст.

Яке аз имом-хатибон аз вилояти Андиҷон, ки аз тариқи видеоселектор суханронии Мирзиёевро шунидааст, ба радиои "Озодлик” гуфт, ки президент асосан дар бораи зарурати бозбинии парвандаҳои онҳое, ки дар рӯйхати сиёҳ афтодаанд, сӯҳбат кард: "Мирзиёев дар ин ҷаласа аз ҷумла гуфт: "Барои як хатои хурд, танзо барои онки як диндор ба дигаре бо телефон СМС фиристодааст, ӯро ба узвият дар ягон равияи мамнӯъ айбдор карда, ба рӯйхати сиёҳ медароранд. Сарфи назар аз онки агар вай одами хубу тоза ҳам бошад. Шумо бояд бо ҳар кадоми онҳо гап занед, парвандаҳояшонро аз нав омӯзед ва бегуноҳонро сафед кунед. То охири сол ба ман ҳисобот диҳед.”

Шавкат Мирзиёев ҳамин тавр амр додааст, ки дар ҳар ноҳия барои бозбинии парвандаҳои диндорони ба рӯйхати сиёҳи мақомоти амниятӣ афтода гурӯҳи махсуси иборат аз 10 нафар таъсис дода шавад. Имоми андиҷонӣ мегӯяд: "Президент барои ташкили гурӯҳҳои махсус фармон дод. Ба ин гурӯҳҳо бояд намояндагони вазорати дохила, Хадамоти амнияти миллӣ, додситонӣ, ҳокимияти маҳаллӣ, намояндагони маҳаллаҳову масҷидҳо ва ниҳодҳои дигар ҷалб шаванд. Онҳо бояд бо нафароне, ки ба рӯйхати сиёҳ афтодаанд, сӯҳбат кунанд ва ҳамчунин машғули корҳои тарғиботӣ шаванд.Мирзиёев фармон дод, ки номи одамони бегуноҳро аз рӯйхати сиёҳ бигиранд, онҳоеро, ки ба ягон иштибоҳи хурду реза роҳ додаанд, сафед кунанд. Президент гуфт, бояд махсусан имомҳо дар ин ҷанба фаъолият нишон диҳанд. Ин гурӯҳи махсус бояд дар поёни сол дар бораи кори анҷомдодааш ба президент ҳисобот диҳад.”

Шавкат Мирзиёев дар мулоқот бо рӯҳониён масъалаи онҳоеро, ки ба далелҳои сиёсӣ ё мазҳабӣ маҳкум ба зиндон шудаанд, ва аъзои хонаводаҳои онҳоро низ дар миён гузоштааст. Шавкат Мирзиёев гуфтааст, фарзандон набояд барои гуноҳҳои падари худ ба ҷавобгарӣ кашида шаванд: "Шумо фарзандони онҳоеро, ки зиндонӣ шудаанд, партофтед.Аз онҳо хабар бигиред, ба тарбияи онҳо машғул шавед, онҳоро ба лагерҳо фиристед, кумак кунед, ки ба донишгоҳҳо дохил шуда, ба таҳсилашон идома диҳанд. Кор кунед бо онҳо!”

Баъди нишаст шоми 15 июн Шавкат Мирзиёев барои имом-хатибони ҷамъшуда дар тарабхонаи "Наврӯз”-и шаҳри Тошканд ифтор ҳам дод. Ин барои бори аввал буд, ки президенти Узбекистон барои диндорон расман ифтор медиҳад.

Мирзиёев ҳамин тавр амр додааст, ки дар тамоми марказҳои вилоятҳо низ шоми 15 июн барои рӯҳониён аз номи президент ифтор ташкил кунанд.

Ин ифтор ба ёди президенти нахустини Узбекистон Ислом Каримов бахшида шуд. Вале дар 27 соли раҳбариаш бар Узбекистон (аз соли 1989 то 2016) худи Ислом Каримов боре ҳам барои рӯҳониён ифтор ташкил накарда буд. Каримов баракс бо саркӯби шадиди рӯҳониёну зиндонӣ кардани ҳазорон нафар аз мардуми диндор ва зери назорати комили давлат овардани умури мазҳабӣ дар ёд мондааст.




назари худро нависед
Қаҳрамонҳои Тоҷикистон