“Сомон Эйр” аз Хуҷанд ба Дубай, Ҷидда ва Истамбул парвозҳоро боз мекунад.
Ширкати ҳавопаймоии "Сомон Эйр" аз ифтитоҳи парвозҳои мустақими байналмилалӣ дар хатсайрҳои Хуҷанд-Дубай-Хуҷанд, Хуҷанд-Ҷидда-Хуҷанд ва Хуҷанд-Истанбул-Хуҷанд хабар медиҳад.Парвозҳо аз Хуҷанд ба Дубай аз 4-уми феврали соли ҷорӣ ҳафтае як маротиба, рӯзҳои якшанбе ба нақша гирифта шудаанд. Вақти парвоз аз Хуҷанд соати 20:10. Ба самти муқобил – 00:10 (шаби Душанбе).
Инчунин аз 6-уми феврал парвозҳо аз Хуҷанд ба Ҷидда ҳар ҳафта рӯзҳои сешанбе анҷом мешаванд. Вақти парвоз аз Хуҷанд 21:15, аз Ҷидда - 02:30 (шаби чоршанбе).
Аввалин парвоз дар масири Хуҷанд-Истанбул-Хуҷанд рӯзи 7-уми март сурат гирифта, минбаъд ҳар ҳафта рӯзҳои панҷшанбе ба роҳ монда мешавад. Парвоз аз Хуҷанд соати 10:00, ба самти муқобил – соати 15:15 ба вақти маҳаллӣ анҷом мешавад.
Илова бар ин, аз 22-юми январ ширкати ҳавопаймоии “Сомон Эйр” аз Душанбе ба Алмаато ҳафтае се маротиба – рӯзҳои душанбе, чоршанбе ва шанбе парвоз хоҳад кард.
Ҳамчунин, аз 24-уми январ ширкати “Сомон Эйр” теъдоди парвозро аз Душанбе ба Тошканд зиёд карда, рӯзҳои душанбе, чоршанбе ва ҷумъа анҷом медиҳад. Ҳама парвозҳо дар ҳавопаймоҳои Boeing 737-800 ва Boeing 737-900 анҷом дода мешаванд.
Бояд гуфт, ки айни ҳол ширкати ҳавопаймоии “Сомон Эйр” аз Тоҷикистон ба Олмон, АМА, Туркия, Чин, Ҳиндустон, Арабистони Саудӣ, Эрон, Русия, Қазоқистон ва Ӯзбекистон парвоз мекунад.
