Ду бозигари мунтахаби футболи Тоҷикистон ба дастаҳои Ӯзбекистон ва Малайзия гузаштанд
Мавсими соли оянда онҳо дар дастаҳои ин кишварҳои хориҷӣ бозӣ мекунанд.
Шериддин БобоевСурат: ФФТ
Ҳамлагари мунтахаби футболи Тоҷикистон ва тими “Истиқлол”-и Душанбе Шериддин Бобоеви 21-сола минбаъд дар дастаи “Пенанг” дар Суперлигаи Малайзия ҳунарнамоӣ мекунад.
Худи Шериддин Бобоев дар саҳифааш дар Instagram тасдиқ кардааст, ки ояндаи наздик барои имзои қарордод бо ин даста ба Малайзия меравад.
Маркази матбуоти Федератсияи футболи Тоҷикистон хабар медиҳад, ки нимҳимоятгари мунтахаби футболи Тоҷикистон ва капитани дастаи “Хатлон”-и Бохтар Умарҷон Шарипов низ дар мавсими соли 2021 дар ҳайати дастаи Суперлигаи Ӯзбекистон - “Тӯрон” (Яйпан) бозӣ хоҳад кард, ки бори аввал ба Лигаи олии футболи ин кишвар роҳхат гирифтааст.
Раиси дастаи “Хатлон” Исроил Шарипов гузаштани футболбозро ба ин даста тасдиқ намуда, изҳор дошт, ки “Тӯрон” бо Умарҷон Шарипов ба муҳлати як сол қарордод ба имзо расонидааст.
Нимҳимоятгари мунтахаби футболи Тоҷикистон рӯзи 2 январ ба ҳайати тими нави худ ҳамроҳ мешавад.
Умарҷон ШариповДар мавсими соли 2020 Умарҷон Шарипов дар ҳайати “Хатлон” ба задани 5 тӯб дар Чемпионати Тоҷикистон ноил гардид. Моҳи сентябри соли гузашта дар вохӯрӣ бо мунтахаби Ӯзбекистон (1:2) ӯ бозии аввалини худро дар тими мунтахаб гузаронид.
