ХӮҶА-КОМАНДИР БОЗ БА ЯК ҲОЛАТИ ГАРАВГОНГИРӢ ДАР СОЛҲОИ ҶАНГ АЙБДОР ШУД
ВКД Тоҷикистон хабар дод, ки дар ҷараёни тафтишот муайян шудааст, ки 23 декабри соли 1993, "марди 56-солаи сокини ҷамоати деҳоти Қизилқалъаи ноҳияи Хуросон, ки пеш бо моддаи 104 Кодекси ҷиноятии Ҷумҳурии Тоҷикистон суд шудааст, бо маслиҳати пешакӣ бо мардони 50, 52, 53 ва 60-солаи сокинони ноҳияҳои Кӯшониён ва Хуросон, дар шоҳроҳи мошингарди Бохтар-Душанбе, наздикии деҳаи Бибихуррами ноҳияи Кӯшониён, марди 52-солаи сокини ҷамоати деҳоти Қизилқалъаи ноҳияи Хуросонро дастгир карда, ӯро бо мақсади куштан мудати 27-шабонарӯз бе додани ғизо дар яке аз анборхонаҳои фермаи хугпарварии ноҳияи А.Ҷомӣ нигоҳ доштаанд. Номбурда бо мақсади зинда мондан кунҷи дари анборхонаи мазкурро суроғ намуда, аз анборхона фирор карда, аз марг наҷот ёфтааст.”ВКД дар иттилоияш ягон ном наовардааст, вале дар гузоришҳои қаблиаш Хӯҷа Каримов, як фармондеҳи собиқи Фронти халқиро "марди 60-солаи сокини ноҳияи Хуросон” ном мебурд.
Хӯҷа Каримов яке аз бераҳмтарин фармондеҳони Фронти халқӣ ба шумор рафта, дар қатли даҳҳо нафар дар солҳои ҷанги шаҳрвандӣ айбдор мешавад.
Хӯҷа Каримов, ки тақрибан 20 сол қабл аз Тоҷикистон фирор карда буд, рӯзи 30 июли соли 2019 дар шаҳри Дубай дастгир гардида, 17 феврали соли ҷорӣ ба Душанбе истирдод шуд.
Аз замони истирдодаш ба зидди ӯ алакай бо иттиҳоми 5 куштор ва қасди куштор дар солҳои ҷанги шаҳрвандӣ айб эълон кардаанд.
