Гурӯҳи марбут ба «Давлати исломӣ» масъулияти таркиши микроавтобусеро дар як маҳаллаи шиаёни Кобул ба дӯш гирифт, ки дар паи он як хабарнигори маъруфи телевизиони Афғонистон кушта шуд. Шохаи Хуросони гурӯҳи «Давлати исломӣ» дар як иддаояш рӯзи 14-уми ноябр тавассути Телеграм канали худ масъулияти ин ҳамларо ба дӯш гирифт. Маркази журналистони Афғонистон чанд соат баъди таркише, ки рӯзи 13-уми ноябр дар маҳаллаи Дашти Барчӣ рух дод, гуфт, ки дар ин ҳодиса журналист Ҳамид Сайғонӣ кушта шуд.

Ҳамсари ин журналисти маъруф ҳам дар як навиштае дар Фейсбук куштори шавҳарашро тасдиқ кард ва гуфт, «Ман Ҳамидро аз даст додам». Дар иддаои худ шохаи Хуросони гурӯҳи «Давлати исломӣ» гуфт, ки бомбаро дар автобусҳо ҷой дода «20 муртади шиа"-ро кушта ва захмӣ кардааст.