РУСТАМИ ЭМОМАЛӢ БА ҲАР ТАЛАБАИ АЪЛОХОНИ ПОЙТАХТ 300 СОМОНӢ СТИПЕНДИЯ МЕДИҲАД
Шаҳрдори Душанбе Рустами Эмомалӣ рӯзи 14 апрел бо имзои қарори №209 таҳти унвони “Дар бораи ҳавасмандгардонии ғолибони озмуни Стипендияи Раиси шаҳри Душанбе барои хонандагону донишҷӯёни муассисаҳои таълимии таҳсилоти умумӣ, таҳсилоти ибтидоӣ ва миёнаи касбии шаҳри Душанбе” аз ҳисоби фонди захиравиаш барои стипендияи толибилмони аълохони мактабҳои пойтахт 484 ҳазору 800 сомонӣ ҷудо кард. Ин қариб ним миллион сомонӣ байни 170 хонандаи аълохони мактабҳои пойтахт тақсим шуда, ҳар кадоме аз ин толибилмон ҳар моҳ 300 сомонӣ стипендия хоҳад гирифт.Стипендияҳои шаҳрдори Душанбе барои толибилмони аълохони мактабҳои пойтахт соли 2017, билофосила баъди ба мақоми шаҳрдори пойтахти Тоҷикистон таъйин шудани Рустами Эмомалӣ
Рустами Эмомалӣ, писари калонии президенти Тоҷикистон Эмомалӣ Раҳмон, 33 сол дошта, аз соли 2017, инак беш аз 4 сол боз дар мақоми шаҳрдори Душанбе кор мекунад. Моҳи апрели соли 2020 ӯ раиси Маҷлиси миллӣ, палатаи болоии парлумони Тоҷикистон низ интихоб шуд ва акнун расман раҳбари дуюми Тоҷикистон дониста мешавад. Рустами Эмомалиро бисёриҳо вориси эҳтимолии курсии президентии падараш мешуморанд.
ҚАРОРИ РАИСИ ШАҲРИ ДУШАНБЕ №209 АЗ 14.04.2021
14 Апрели 2021, ЧоршанбеДар бораи ҳавасмандгардонии ғолибони озмуни Стипендияи Раиси шаҳри Душанбе барои хонандагону донишҷӯёни муассисаҳои таълимии таҳсилоти умумӣ, таҳсилоти ибтидоӣ ва миёнаи касбии шаҳри Душанбе
Бо мақсади иҷрои қарори Раиси шаҳри Душанбе аз 24 июни соли 2017, №363 “Дар бораи таъсис додани стипендияи Раиси шаҳри Душанбе барои хонандагону донишҷӯёни муассисаҳои таҳсилоти умумӣ, ибтидоӣ ва миёнаи касбии шаҳри Душанбе”, мутобиқи моддаҳои 11 ва 191 Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон», моддаи 45 Қонуни Ҷумҳурии Тоҷикистон «Дар бораи маориф» ва моддаҳои 19, 20 ва 33 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ»
ҚАРОР МЕКУНАМ:
- Рӯйхати барандагони Стипендияи Раиси шаҳри Душанбе барои хонандагони муассисаҳои таълимии таҳсилоти умумии шаҳри Душанбе дар соли таҳсили 2020 – 2021 тибқи замимаи 1 тасдиқ карда шавад.
- Сарраёсати молияи шаҳри Душанбе аз ҳисоби маблағҳои фонди захиравии Раиси шаҳри Душанбе ба бахши муҳосиботи дастгоҳи Раиси шаҳри Душанбе барои сарфароз гардонидани барандагони стипендияи мазкур дар соли таҳсили 2020-2021 маблағи 484 800 (чорсаду ҳаштоду чор ҳазору ҳаштсад) сомонӣ тибқи замимаи 2 ҷудо намояд.
- Муовини Раиси шаҳри Душанбе, сарпарасти соҳа, шуъбаи рушди иҷтимоӣ ва робита бо ҷомеаи дастгоҳи Раиси шаҳри Душанбе, Раёсати кор бо ҷавонон ва варзиши шаҳри Душанбе ҷиҳати дар фазои тантанавӣ бо шаҳодатнома ва маблағҳои стипендияи Раиси шаҳри Душанбе сарфароз гардонидани ғолибон чораандешӣ намоянд.
- Бахши муҳосиботи дастгоҳи Раиси шаҳри Душанбе истифодаи мақсаднок ва пардохти саривақтии маблағи ҷудогардидаро мувофиқи тартиби муқарраргардида, таъмин намояд.
- Шуъбаи иттилооти дастгоҳи Раиси шаҳри Душанбе, муассисаҳои давлатии «Телевизиони Душанбе» ва рӯзномаи «Паёми Душанбе» инъикоси васеи қарори мазкур ва ҷараёни баргузории чорабиниҳоро тавассути воситаҳои ахбори омма таъмин намоянд.
- Қарори мазкур барои тасдиқ ба Маҷлиси вакилони халқи шаҳри Душанбе пешниҳод карда шавад.
- Назорати иҷрои қарори мазкур ба зиммаи муовини Раиси шаҳри Душанбе, сарпарасти соха гузошта шавад.
