ГЕНЕРАЛ МАНСУРҶОН УМАРОВРО ДУБОРА БА БЕМОРИСТОН БУРДААНД. ИН ДАФЪА БО АЛОМАТҲОИ ХУНРЕЗИИ МЕЪДА
Генерал-лейтенант Мансурҷон Умаров, сардори идораи зиндонҳои Тоҷикистонро рӯзи 5 сентябр дубора дар шифохонаи "Истиқлол” бистарӣ кардаанд. Манобеи Радиои Озодӣ мегӯянд, ки генерал Умаров ин дафъа дучори хунрезии меъда шудааст. Генерал Умаров тоза ҳафтаи гузашта баъди як моҳи табобат аз "илтиҳоби шуш” аз бемористони бемориҳои сироятии Душанбе ҷавоб шуда буд. Гумон мерафт, ки Мансурҷон Умаров дар аввали моҳи август дар тӯйи домодии писари дӯсташ полковник Хайриддин Тӯраев, маъруф ба Эшони Сайиднуриддин, сардори собиқи хадамоти амнияти авиатсионии фурудгоҳи шаҳри Душанбе, гирифтор шудааст. Дар пайи он тӯй Хайриддин
Тӯраев, бародараш Ҷамолиддин ва домоди бародараш – корманди Додситонии кулл Зубайдулло Неъматов паи ҳам вафот карданд.
Моҳи май Носир Умаров, корманди ширкати "Барқи Тоҷик” ва бародари генерал Умаров низ аз олам чашм пӯшид. Нафарони огоҳ гуфта буданд, ки Носир Умаров қурбони коронавирус шудааст ва ба ин далел, маросими дафнаш бидуни ширкати одами зиёд ва таҳти тадбирҳои шадиди беҳдоштӣ доир шуда буд.
Радиои Озодӣ
Мансурҷон Умаров, сардори Идораи зиндонҳо ва муовини вазири адлияи Тоҷикистон, дубора дар бемористон бистарӣ шудааст. Манобеи боварбахши Радиои Озодӣ дар шифохонаи "Истиқлол" ва Сарраёсати иҷрои ҷазои ҷиноӣ ин хабарро рӯзи 7-уми сентябр тасдиқ карданд.
Ба гуфтаи як манбаъ дар бемористони "Истиқлол”-и Душанбе, "Мансурҷон Умаров рӯзи 5-уми сентябр пас аз бад шудани вазъи саломатиаш, аз хона ба бемористон интиқол ёфт".
Манбаъ афзуд, Умаров, ки нав аз бемории илтиҳоби шуш ё пневмония табобат гирифта буд, ин бор ба хунрезии меъда дучор шудааст.
"Рӯзи шанбе якбора саломатиашон бад шуд ва он касро ба беморхонаи "Истиқлол” оварданд. Табибон муайян карданд, ки Мансурҷон Умаров ба хунрезии меъда (кровотечение желудка) гирифтор шудааст. Ҳоло зери назорати табибон ҳастанд, аз рӯи овардаашон аҳволашон беҳтар аст. Хунравии меъдаашон ҳоло манъ шудагӣ аст”, - афзуд ҳамсуҳбати мо дар беморхонаи "Истиқлол”.
Мақомот ин хабарро расман тасдиқ ё рад накарданд.
Як корманди Сарраёсати иҷрои ҷазои ҷиноӣ низ ба Радиои Озодӣ гуфт, рӯзи шанбе наздикони Мансурҷон Умаров ба онҳо занг зада гуфтаанд, Умаровро ба беморхона бурданд. Ҳамсуҳбати мо дар идораи зиндонҳо афзуд, дар бораи вазъи саломатии роҳбарашон маълумоти зиёд надоранд, чун табибон ба онҳо иҷозаи вохӯрӣ намедиҳанд.
Мансурҷон Умаров ҳафтаи гузашта баъд аз муолиҷа аз бемории илтиҳоби шуш ё пневмония аз беморхона рухсат шуда буд. Масъулони беморхонаи клиникии шаҳрии бемориҳои сироятии кӯдакона рӯзи 7-уми сентябр гуфтанд, Умаров чанд муддат дар инҷо аз бемории илтиҳоби шуш табобат гирифт.
Мансурҷон Умаров дар пайи ошӯби хунин дар зиндони шаҳри Хуҷанд моҳи ноябри соли 2018 бо қарори ҳукумати Тоҷикистон ба ҷойи Иззатулло Шарифзода сардори Раёсати маҳбасҳо таъин шуд.
Ӯ генерал-лейтенант ва 53-сола аст. Ҳашт сол дар мансаби муовини аввали раиси Кумитаи давлатии амнияти миллии Тоҷикистон кор кардааст.
Дар моҳи майи имсол Носир Умаров, бародари Мансурҷон Умаров ва корманди ширкати "Барқи тоҷик" дар бемористони Зарафшони шаҳри Душанбе даргузашт. Яке аз наздикони ӯ рӯзи 5-уми май гуфта буд, Носир Умаровба эҳтимоли зиёд аз коронавируси нав фавтидааст, чун ҷасадро ба пайвандон надоданд.
