Ҳушдор ба тоҷикистониён аз барфрезии шадиду тармафароӣ ва сангрезӣ
Кумитаи ҳолатҳои фавқулодаи Тоҷикистон дар такя ба иттилои Агентии ҳавосанҷии кишвар хабар додааст, ки то 22-уми январ ҳаво боронӣ боқӣ монда, дар баъзе ноҳияҳои кӯҳии кишвар барфи шадид меборад,
Ба иттилои манбаъ, рӯзҳои 21 — 22 январ дар баъзе ҷойҳо туман дар назар дошта шудааст.
Дар ноҳияҳои тобеъи ҷумҳурӣ, қисмати ғарбии ВМКБ ва дар роҳҳои мошингарди Душанбе — Варзоб — Айнӣ — Хуҷанд, Ваҳдат — Рашт — Тоҷикобод — Лахш, Душанбе-Сангвор, Ш. Шоҳин-Дарвоз, Ванҷ-Хоруғ, Хоруғ-Ишкошим-Мурғоб хатари лағзиши тарма ва резиши санг боқӣ мемонад.
Ин ниҳод, ҳушдор медиҳад, ки аз сабаби барфи зиёд ва боди сахт эҳтимоли канда шудани сими интиқоли барқ дар минтақаҳо вуҷуд дорад, дар кӯҳҳо ва роҳҳои кӯҳӣ ҳолатҳое назири барфтӯда, яхбандӣ ва ғайра ба вуҷуд меояд, ки ин ҳаракати мошинҳоро ба ҳар самт душвор мекунад.
Ҳамчунин аз барфи зиёд ва боди сахт шикастани шоху танаи дарахтон ва симчӯбҳои сустниҳоди рекломҳо имкон дорад, ки ин ҳама метавонад ба ҷони инсонҳо ва равуои мошинҳо хатар эҷод кунад.
КҲФ аз шаҳрвандон ва меҳмонони кишвар дархост кардааст, ки дар ин гуна рӯзҳо аз равуои безарурат худдорӣ намоянд.
«Рафтан ба кӯҳу доманакӯҳҳо барои ҷамъоварии ҳезум, ширкоргоҳ ва чоравочаронӣ низ бехатар нест. Хонаҳоро гарм нигоҳ доред, аз асбобҳои барқӣ дуруст истифода кунед ва нагузоред, ки онҳо сабаби сӯхтор шаванд», — таъкид кардааст ин нищод.
Ба ронандагон тавсия дода шудааст, ки бо омодагь ба роҳ бароянд ва ба хотирӣ таъмини амнияти худу ҳамсафаронашон ҳаргиз суръати ҳаракатро боло набаранд
Сарчашма:sputnik-tj