ВИДЕО АЗ ҶОИ ҲОДИСА ВА ТАФСИЛОТИ МАРГИ ФОҶИАВИИ 6 УЗВИ ЯК ХОНАВОДА ДАР МӮЪМИНОБОД
Сокинони Мӯъминобод ба пойгоҳи хабарии “Бомдод” як видеои кӯтоҳ аз маҳалли садамаи пурқурбонии рӯзи 22 май дар роҳи Кӯлоб – Мӯъминободро, ки боиси марги 6 узви як хонавода аз деҳаи Фурӯзобаи ҷамоати Боғгаии ноҳияи Мӯъминобод шуд, фиристоданд. Онҳо ҳамчунин бархе ҷузъиёти ин фооҷиаи талхро қисса карданд.Тавре қаблан хабар додем, рӯзи 22 май 6 узви як хонавода – як модар бо ду писару як духтар ва келину набераи ҳафтсолааш ҳангоми ба тӯй рафтанашон дар роҳи Кӯлоб – Мӯъминобод бар асари ба мошини боркаш бархӯрдани мошинаш ҷон бохтанд.
Дар видео дида мешавад, ки бар асари бархӯрд бо мошини боркаш қисмати пеши мошини рангаш сабзи ин хонаводаи бетақдир комилан тикаву пора шудааст ва ин ҳама қисматҳои тикаву пора шудаи мошинро бо брезент пӯшондаанд.
Ҳамсуҳбатони “Бомдод” гуфтанд, ки ин ҳодиса дар ҳудуди ноҳияи Мӯъминобод дар мавзеи Толеъ рӯй додааст. “Аз қазо, толеи ин хонавода дар мавзеи Толеъ бетолеӣ кард ва дар як рӯз аз ин оила якбора 6 тобут бароварданд”, – гуфтанд онҳо.
Ҳамсуҳбатони “Бомдод” гуфтанд, қурбониёни ин садама ҳама аз оилаи раҳматии Назрӣ буданд. Акаи Назрӣ худ соли 2007 ба иллати бемории саратон аз дунё рафта буд.
Ҳар сол дар роҳҳои Тоҷикистон бар асари садамаҳо то 400 нафар ба ҳалокат расида, беш аз 1200 тани дигар маъюб мешаванд.
Худо раҳматашон намояд.
Акнун аз ин оилаи бузург ҳамагӣ як писар боқӣ монд.
Бисёр талх ва аламовар буд, ҳангоми дидани 6 тобут дар як ҳавлӣ…
Худо ҳамаи мову Шуморо нигаҳбон бошад!
Афсус, ки марг – амри тақдир аст …
