. / Иқтисодиёт
Тоҷикистон ба корхонаи истеҳсоли семент барои ҳамсоякишварҳо табдил меёбад
Сеяки сементи дар ҷумҳурӣ истеҳсолшуда ба хориҷи кишвар фурӯхта мешавад.
Корхонаи истеҳсоли сементи ДушанбеСурат: Asia-Plus
Дар зарфи 9 моҳи соли равон аз Тоҷикистон ба кишварҳои ҳамсоя беш аз 990 ҳазор тонна семент содирот шуд, хабар медиҳад Вазорати саноат ва технологияҳои нави Тоҷикистон. Дар ин давра корхонаҳои ҷумҳурӣ ҳамагӣ зиёда аз 3,2 млн тонна семент истеҳсол карданд.
Гуфта мешавад, ҳиссаи ин навъи масолеҳи сохтмони содиротшуда дар ҳаҷми умумии сементи тавлидшуда ҳудуди 31%-ро ташкил медиҳад.
Дар ин давра ба Ӯзбекистон 562 ҳазор тонна, ба Афғонистон – 391 ҳазор тонна ва Қирғизистон – 43 ҳазор тонна семент фурӯхта шудааст.
Дар саросари ҷумҳурӣ 16 корхонаи истеҳсоли семент бо иқтидори умумии 5,6 млн тонна маҳсулот дар як сол ба қайд гирифта шудааст.
Корхонаҳои асосии истеҳсоли семент дар кишвар 3 корхонаи муштараки Тоҷикистону Чин – «Чунгтсай Моҳир семент» (27,9%), «Хуаксин Ғаюр семент» (27,1%) ва «Хуаксин Ғаюр Суғд семент» (26,7%) мебошанд, ки наздики 82% аз ҳаҷми умумӣ ба ҳиссаи ин корхонаҳо рост меояд.
Ҳиссаи корхонаи “Сементи тоҷик” (“Тоҷиксемент”)-и Душанбе дар ҳаҷми умумии истеҳсоли семент дар Тоҷикистон айни замон 5,2%-ро ташкил медиҳад.
Ҳаҷми истеҳсоли семент дар ҷумҳурӣ тайи панҷ соли охир бо кумаки сармоягузорони Чин даҳҳо маротиба афзуд.
Соли 2019 дар ҷумҳурӣ ҳаҷми рекордии истеҳсоли ин навъи масолеҳи сохтмон – 4,2 млн тонна ба қайд гирифта шуд, ки дар муқоиса бо соли пешин 400 ҳазор тонна зиёдтар буд.
Ояндаи наздик афзоиши чунин иқтидорҳо дар назар аст. Аз ҷумла, ширкати “Моҳир семент” бо кумаки сармоягузорӣ аз Чин дар ҷануби ҷумҳурӣ корхонаи нави сементбарории иқтидораш 600 ҳазор тонна месозад.
Дар ҳамин ҳол, экологҳо аз афзоиши истеҳсоли семент изҳори нигаронӣ карда, қайд мекунанд он ба вазъи экологияи ҷумҳурӣ ва солимии одамон зиёни ҷуброннопазир ба бор оварда метавонад.
