Боз як модар худ ва фарзандашро ба дарё афканд. Кумитаи ҳолатҳои фавқулодда ҳушдор медиҳад: Азизонатонро эҳтиёт кунед!
КҲФ Тоҷикистон хабар дод, ки нимаи дуюми рӯзи 27 сентябр як зани 31-сола аз ноҳияи Ёвон худро ҳамроҳи духтари 9-солааш ба дарёи Вахш андохта, худкушӣ кардааст. Ҷасади Қурбоной Зарифова ва духтарашро 30 метр пойинтар аз ҷое, ки худро ба дарё андохтанд, пайдо кардаанд. Дар камтар аз ду моҳи охир ин алакай дуюмин ҳодисаи худкушии занон бо фарзандонашон дар Тоҷикистон аст. Моҳи август як зани 30-сола дар ноҳияи Рашт худро ҳамроҳи се кӯдаки 9, 6 ва 3-солааш ба дарёи Сурхоб партофта, худкушӣ карда буд.КҲФ Тоҷикистон
Зарфи як шабонарӯзи гузашта дар қаламрави кишвар боз як ҳодисаи нохушу фоҷеабор - худкушӣ бо фарзанд ба қайд гирифта шуд.Баъд аз зуҳри рӯзи 27-уми сентябри соли 2020 як сокини 31-солаи ноҳияи Ёвон бо духтарчаи 9-солааш худро ба дарёи Вахш сарозер кард.
Баъди дарёфти хабари ин худкушӣ наҷотдиҳандагони кӯҳии бахши Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар шаҳри Норак ба ҷойи ҳодиса расиданд ва баъди ним соати розандозии корҳои ҷустуҷӯӣ ин ду ҷасадро тақрибан 30 метр дуртар аз макони ҳодиса пайдо ва ба мақомоти ҳифзи ҳуқуқи шаҳри Норак супурданд.
Дар ҳамин иртибот Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикитсон бо исрор аз аҳолӣ хоҳиш мекунад нисбат ба пайвандону хешон бамуҳаббат бошанд.
Ҳаёти худ ва атрофиён ва наздиконатонро азиз доред!
Радиои Озодӣ
Қурбоной Зарифова, сокини 32-солаи ноҳияи Ёвон бо духтари 10-солааш худро ба дарёи Вахш андохтааст ва мақомот мегӯянд, ки ҷасадҳои онҳоро ним соат баъд аз ҳодиса аз дарё берун оварданд. Ҳодиса рӯзи якшанбеи 27-уми сентябр дар шаҳри Норак иттифоқ афтодааст. Ҷасади ин зан ва духтараш ҳоло дар сардхона нигоҳ дошта мешаванд.
Ба гуфтаи Файзулло Ҳусейнзода, як масъули Кумитаи ҳолатҳои фавқулодда дар ҳукумати шаҳри Норак, ин зан аз болои як пул худу духтарашро ба дарё андохтааст ва ҷасади онҳоро 30 метр поинтар аз маҳалли ҳодиса аз дарё берун оварданд.
Ӯ гуфт, ки сабаби ин ҳодиса ҳанӯз маълум нест, вале ин зан аз хона баромада ва гуфтааст, ки ба бозор меравад. Ба гуфтаи Файзуллоҳ Ҳусейнзода, ин зан дар маконе, ки худро ба дарё андохт "пойафзолашро мондааст, дар халтааш корти бонкӣ, пул ва шиносномааш будааст"
Шоҳидон ва чанд масъул аз ҳукумати шаҳри Норак гуфтанд, ки эҳтимолан хушунату ноумедӣ ва мушкили иқтисоди сабаб шудааст, ки зани ҷавон худ ва духтари ноболиғашро ба дарё андохтааст.
Аз ҳукумати ноҳияи Ёвон ба Радиои Озодӣ гуфтанд, ки ҳоло ҷузъиёт ва сабаби худкуширо маълум накардаанд. Тахмина Ҳоҷиева, роҳбари бахши кор бо занон ва оилаи ҳукумати ноҳияи Ёвон гуфт, ки аз ҳодиса тоза хабардор шуданд ва ҳоло ба манзили ин зан мераванд, то ангезаҳои даст ба чунин кор задани Қурбоной Зарифоваро маълум кунанд.
Дар солҳои ахир чанд ҳодисае расонаӣ шуд, ки занон ҳамроҳ бо фарзандон қасд ба ҷони худ карданд. Моҳи августи имсол як зани 30-сола дар ноҳияи Рашт худ ва се кӯдакашро ба дарё партофта, худкушӣ кард. Кӯдакон 3, 6 ва 9-сола буданд.
Соли 2016 Зӯҳро Маҳмуродоваи 25-сола аз Норак худ ва чаҳор фарзандашро ба дарёи Вахш андохт, ки дар натиҷа ҳама ба ҳалокат расиданд. Пеш аз ин як модари ҷавон дар ноҳияи Вахш ҳамроҳ бо се тифли хурдсолаш кӯшиши худкушӣ карда, худ наҷот ёфт, вале боис ба ҳалокати се кӯдакаш шуд.