ФАВРӢ! ДАРГУЗАШТИ ГЕНЕРАЛ РАҲМОНЗОДА АЛИХОН ФУТУР
Сардори раёсати экологӣ ва сайёҳии вазорати корҳои дохилии Тоҷикистон генерал-майори милитсия Раҳмонзода Алихон Футур рӯзи 1 сентябр дар бемористони "1-ум Советский”-и шаҳри Душанбе дар синни 62 аз олам чашм пӯшид. Ба гуфтаи наздиконаш, генерал Раҳмонзода ва ҳамсараш гирифтории бемории коронавирус шуда буданд. Ҳамсараш дар ҳолати вазнин дар бемористон қарор дорад. Ҷанозаи генерал Алихон Раҳмонзодаро рӯзи 1 сентябр дар оромгоҳи Сариосиёи шаҳри Душанбе ба хок супурданд.Алихон Раҳмонзода 10 феврали соли 1958 дар деҳаи Паркамчии ҷамоати Пушинги ноҳияи Данғара ба дунё омада, соли 1987, дар саффи милитсия хидмат мекард.
Ӯ собиқаи кориашро аз ваколатдори фаврии шуъбаи сеюми раёсати кофтукови ҷиноии ВКД сар карда, то ба мақоми сардори раёсати мубориза бо маводи мухаддири ин вазорат ва муовини вазир расид. Алихон Раҳмонзода чанд сол роҳбарии Сарраёсати зиндонҳои вазорати адлияро низ бар уҳда дошт ва сипас боз ба ВКД баргашта, сардории чанд раёсат, аз ҷумла раҳбарии Хадамоти "Муҳофиза”-ро бар ӯҳда дошт. 30 октябри соли 2019 Алихон Раҳмонзода раҳбари раёсати экологӣ ва сайёҳии ВКД, ба истилоҳ "пулиси сайёҳӣ” таъйин карда шуд.
Алихон Раҳмонзода намояндаи як хонаводаи пурнуфуз аз Данғара мебошад. Бародари ӯ генерал Раҳмонзода Лолахон Футур чандин сол раиси Агентии давлатии амволи махсус буд.
Раҳмонзода Алихон Футур– генерал-майори хизмати дохилӣ, соли таваллудаш 10 феврали соли 1958, миллаташ: тоҷик, маълумоташ: Олӣ - ҳуқуқӣ. Мукофотҳои Ҳукуматӣ: Медали «Ҷасорат». Хизмат дар мақомоти корҳои дохилӣ: аз 1 апрели соли 1987. Дар давоми собиқаи корӣ дар вазифаҳои гуногун фаъолият намудааст:
Ваколатдори оперативи шӯъбаи 3-юми РКҶ ВКД, ваколатдори оперативи шӯъбаи РКД ВКД, ваколатдори оперативи шӯъбачаи ташкилии методии РКҶ ВКД, ваколатдори калони оперативии шӯъбаи мубориза бар зидди ҷиноятҳои нашъамандии РКҶ ВКД, сардори шӯъбаи РМЗҶМ-и ВКД, сардори шӯъбаи мубориза бар зидди ҷиноятҳои нашъамандии РМЗҶМ-и ВКД, сардори шӯъбаи Раёсати мубориза бар зидди ҷиноятҳои гардиши ғайриқонунии маводи мухаддири ВКД, муовини сардори Раёсати мубориза бар зидди ҷиноятҳои гардиши ғайриқонуни маводи мухаддири ВКД, сардори Раёсати мубориза бар зидди ҷиноятҳои гардиши ғайриқонунии маводи мухаддири ВКД, сардори Раёсати корҳои ислоҳии ВКД, муовини Вазир, ӯ низ сардори Раёсати корҳои ислоҳии Вазорати адлия, муовини Вазири корҳои дохилии Ҷумҳурии Тоҷикистон. Фармондеҳи Баталёни фаврии таъиноти махсуси қисми ҳарбии (3502) Қӯшунҳои дохилии ВКД, Командири Баталёни 1 фаврии таъиноти махсуси Қӯшунҳои дохилии ВКД, сардори Раёсати ВКД Ҷумҳурии Тоҷикистон.